Rusiyeniñ nezaretinde olğan Qırımnıñ Yuqarı mahkemesi qırımtatar faallerine memuriy cöremeler aqqında çıqarılğan qararlarnı deñiştirmedi. Bunı "Qırım birdemligi" cemaat imayecisi Sabri Talıpovğa atfı etip bildire.
Şu cümleden, mahkeme Lilâ Lümanovanıñ cöremesine qarşı berilgen istinaf şikâyetini red etti.
"Advokatnıñ bildirgenine köre, evel siyasiy mabüsniñ ömür arqadaşı Lilâ Lümanovanıñ davası boyunca mudafaa tarafı başlanğıç mahkemeniñ mahkemecisine itiraz bildirgen, amma dava materiallarında bu fakt yoqtır. İstinaf kollegiyasınıñ mahkemecisi, bunıñ vesiqalaştırılmamasını añlattı. Sabri Talıpovnıñ sözlerine köre, Merkeziy rayon mahkemesiniñ mahkemecisi oturışnıñ protokolını yazmağa işçin bermegen... Yaqınlarda tam bu mahkemecini sarhoş alda maşna idare etkeni ve yol hızmetiniñ hadimleri ile çatışma içün mahkemeci statusından marum etilgen. Mudafaa tarafı mahkemede bunı ve mahkemeci qadınlarğa qıçırğanını qad etti", - dep yazıla bildirmede.
Haber etilgeni kibi, mahkemeci bunı körmemezlikke urğan ve başlanğıç mahkemeniñ qararını quvette qaldırğan.
Lilâ Lümanovanıñ şikâyetinen beraber Elvina Azizova, Zarema Nimetulayeva, Mustafa Bekirov, Şevket Kelâmova ve Zulârı İbragimovanıñ davaları baqılğan.
Yanvarnıñ 24-nde Rusiyeniñ nezaretinde olğan Qırımnıñ Yuqarı mahkemesi "sanitar qaidelerni ve içtimaiy nizamnı bozmaqta" qabaatlanğan dört qırımtatar faaline memuriy cöremeler aqqında çıqarılğan qararnıdeñiştirmedi.
Rusiye kontrolindeki Qırım Yuqarı mahkemesi yanvarnıñ 12-nde qırımtatar faalleriniñ para cezalarına qarşı şikâyetlerni qanaatlendirmedi.
Qırımtatar halqınıñ aqsaqalları qırımtatar halqına qarşı işkence ve repressiyalarnı toqtatmağa talap ete.
