Rusiyeniñ nezaretinde olğan Qırımnıñ Yuqarı mahkemesi "sanitar qaidelerni ve içtimaiy nizamnı bozmaqta" qabaatlanğan dört qırımtatar faaline memuriy cöremeler aqqında çıqarılğan qararnı deñiştirmedi. Bunı "Qırım birdemligi" cemaat imayecisi Ayder Suleymanovğa atfı etip bildirdi.
"Abdulmecit Seytumerov ve Remzi Nimetullayev RF Ceza qanunnamesiniñ 20.6.1 maddesini ("Fevqulâde vaziyette özüni tutuv qaidelerine riayet etmeme") bozuv ile qabaatlandı. Eki erkek de Qurmandaki "Hizb ut-Tahrir davası" mabüslerine çıqarılğan ükümge qarşı istinaf baqılacaq oturışuvğa diñleyici olaraq kelgen edi. Mahkeme maddeniñ ekici qısmına binaen olarğa 30 biñ ruble ve birinci qısmına binaen 10 biñ ruble para cezasını berdi. Bekir Gaziyev RF Ceza qanunnamesiniñ 20.2 maddesiniñ 5-nci qısmını bozuv ile qabaatlandı. O oktâbrniñ 29-nda Rostov-na-Donuda ükmü çıqarılğan Bağçasaraydaki "Hizb ut-Tahrir davasınıñ" mabüslerine qoltutmağa kelgen edi. Mahkeme oña 13 biñ ruble para cezasını berdi", - dep yazıda bildirmede.
Advokat Edem Semedlâyevni muvaqqat tutuv izolâtorından çıqqan zaman onı qarşılap almağa kelgen eki faal "içtimaiy yerlerde vatandaşlarnıñ küttleviy bulunuvını teşkil etmesinde" qabaatladılar. Safinaz Gazançiyanniñ cöremesini biñ rublege eksiltti. Alfiya Zudiyevanıñ davası boyunca mahkeme oturışı keçirilmedi.
"Bu qararlarnı qanunsız sayamı ve Avropa insan aqları mahkemesinde temyiz etecekmiz", - dedi Suleymanov.
Qırımtatar halqınıñ aqsaqalları qırımtatar halqına qarşı işkence ve repressiyalarnı toqtatmağa talap ete.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
