Rusiye kontrolindeki Qırım Yuqarı mahkemesi yanvarniñ 12-nde qırımtatar faalleriniñ para cezalarına qarşı şikâyetlerni qanaatlendirmedi. Bu aqta «Qırım birdemligi» cemaat birleşmesi imayeci Ayder Suleymanovğa esaslanıp bildirdi.
Onıñ qayd etkenine köre, mahkeme er bir şikâyetniñ baqıluvına başta 15 daqqa berdi, lâkin yeterli olmadı ve esnaslar sozuldı. İmayeci, qadı tarafnı aşıqtırdı ve lafnı bitirmege bermedi, dep ayttı.
«Belli bir meraq bar, dep tüşünem – mahkeme davalarnı er taraflama incelemek ve tarafsız ve adaletli bir qarar çıqarmaq vazifesini almadı. Onıñ istegi – tez-tez oturışuv keçirip, birinci qurulışlarnıñ qararlarını deñiştirmemek», – dep qayd etti Suleymanov.
Oturışuv neticesinde Seydamet Mustafayev, Ramazan Susanov, Enver Yuldaş ve Eldar Yakubov farqlı künlerde kütleviy toplaşuvlarda iştirak etkenleri içün 10 biñ ruble para cezalarını aldı. Alimhan Abitov 15 biñ ruble para cezasını aldı. İmaye mahkeme qararını Avropa insan aqları mahkemesine şikâyet etecek.
Qırımtatar halqınıñ aqsaqalları qırımtatarlarğa qarşı işkence ve repressiyalarnı toqtatmağa talap etti. Olarğa Qırımdaki Canköy rayonınıñ Bay Könçek (Oktâbr) köyüniñ sakinleri qoşuldı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
