İlhaq etilgen Qırımda yılnıñ başından berli yanğınlarda 18 adam elâk oldı, umumen bu vaqıtta yarımadada 200-den ziyade yanğın oldı. bunı rusiye nezaretindeki Qırım fevqulâde vaziyetler naziri Maksim Gramotnıy bildirdi.
"Yanğınlarnıñ artması quru deñişmez ava ile alâqalıdır. 201 yanğından 70%-ı - landşaft yanğınlarıdır, yani açıq mıntaqada olğan yanğınlar, 80 yanğın meskenlerde oldı, 18 adam elâk oldı", - dedi RİA-Krım rusiyeli matbuatqa tefsir bergende o.
Gramotnıy, yanğınlarnıñ esas sebebi ateşke diqqatsızlıq, ilk olaraq, sarğoş alda sigaret çekmesidir, dep qayd etti.
"18 adamnıñ episi mesken sektorda elâk oldı. Vaziyet böyledir: yuqlap qalğan, sigaretası elinden tüşken, minderge, adam oturğan kresloğa tiygen, küyip başlağan, yanğan, zeerli gaz adamnı öldürgen. Telükesizlikke emallıqnen baquv neticede böyle vaziyetlerge çevirile", - qayd etti Gramotnıy.
Aqmescitte yanvarniñ 20-sinde qaravul odası yandı, neticesinde işçi elâk oldı.
Yanvarniñ 19-ında Qarasuvbazar rayonınıñ Efendiköyünde (Gruşevka) yanğında eki adam elâk oldı.
Kezlevde (Yevpatoriya) "Ozero snovideniy" SPA kompleksinde yanvarnıñ 13-ünde saba yanğın oldı. Qurtarıcılar 4 işçi ve 55 müşterini tahliye etti.
Yanvarniñ 12-sinde bazar künü Ay-Petri platosı rayonında eki qatlı tahta bina yandı. Yanğın 50 metr kârege tarqaldı. Yaralanğanlar olmadı.
