Aqmescitte yanvarniñ 20-sinde qaravul odası yandı, neticesinde işçi elâk oldı, bunı fevquale hızmetler organlarındaki menbaasına atıf etip, "Krıminform" agentligi bildire.
"Yanğın Petropavlovskaya, 15 soqağında oldı. Evden ayrı turğan konsyerj budkası tamamınen yanıp bitti. Budkada olğan konsyerj sağ qalmadı", - subetdeşiniñ sözlerinden yaza matbuat.
Qazanı körgen adamlarnıñ sözlerinden, yanğıncılar tez keldi, amma yanğın olğan azbarğa birden kirip olamadılar. O yerde park etilgen maşnalar yanğıncılarğa mania oldı. Yanğın kirişi ise qanunsız inşaatnen qapatılğan edi.
"Yanğın hızmetiniñ bölügi yaqın edi, olar tez keldi. Ateşke barıp yetkende, onı tez söndürdiler", - qoştı haber agentliginiñ menbaası.
Hatırlatayıq, keçken afta içinde Qırımda 54 yanğın oldı.
Yanvarniñ 19-ında Qarasuvbazar rayonınıñ Efendiköyünde (Gruşevka) yanğında eki adam elâk oldı.
Kezlevde (Yevpatoriya) "Ozero snovideniy" SPA kompleksinde yanvarnıñ 13-ünde saba yanğın oldı. Qurtarıcılar 4 işçi ve 55 müşterini tahliye etti.
Yanvarniñ 12-sinde bazar künü Ay-Petri platosı rayonında eki qatlı tahta bina yandı. Yanğın 50 metr kârege tarqaldı. Yaralanğanlar olmadı.
