Qırımda koronavirus: birinci afta

Tahminen bir afta evel Rusiye nezaretindeki Qırım akimiyeti yarımadada koronavirus infektsiyasınıñ ilk adisesi aqqında ilân etti. Altı kün içinde resmiy olaraq qayd etilgen adiselerniñ sayısı on dörtke yükseldi. Qırım.Aqiqat virusnıñ yayılma dinamikası aqqında malümat topladı.

Dünya ülkeleri koronaviru pandemiyası sebebinden sıñırlarını ve ava alâqalarını qapatıp başlağanından soñ, Rusiye tarafından işğal etilgen Qırımda bütün hızmetlerni "yüksek azırlıq rejimi"ne keçirdiler. Yarımdada epidemiyağa qarşı sıñırlavlar kün-künden sertleşe, amma alâ daa resmiy olaraq karantin ilân etilmedi.

Koronavirusnıñ Qırımda ne suratta yayılğanınıñ kerçegini bilmek imkân yoq. Monitoring yapmaq içün Ukrainanıñ ihtisaslı hızmetlerniñ yarımadağa çıqışı yoq. Amma hastalıq aqqında malümat er kün Rusiye nezaretindeki Qırım akimiyeti tarafından berile. Olarnıñ kerçekligi halqara teşkilâtlar tarafından tasdıqlanmadı, Qırım uquq qoruyıcı gruppa ise, yerli akimiyet infektsiyanıñ aqaqiy derecesini açıqlamağanını farz ete.

Qırım.Aqiqat bergen malümat, Qırımda 2014 senesi yaratılğan Rusiye akimiyet organlarinıñ açıq malümatına esaslana. Mustaqil menbaalardan şimdilik haber yoq.

Qırım akimiyetiniñ resmiy statistikası köstere ki, er kün yüzlerce adamlar koronavirus şübesi olıp, ekimlerniñ nezaretine tüşe.

Birinci adise

Yerli akimiyet Qırımda ilk koronavirus adisesini martnıñ 21-inde ilân etti: Kezlev sakini Qırım ve Herson vilâyeti sıñrından evge qayttı, dey Qırımnıñ rusiyeli başı Sergey Aksönov.

Fevral ayından başlap Qırımda, başqa memleketlerni ziyaret etkenlerni izolâtsiyağa yollap başladılar.

"Barışıq istesen - cenkke azırlañ. Qırımğa koronavirus infektsiyasınıñ yibermemek içün olduqça tedbirler köremiz", - dedi Rospotrebnadzornıñ başı Natalya Penkovskaya martnıñ 21-inde.

O vaqıt Qırımda, yerli Sağlıq Nazirligine köre, 286 adam tibbiy nezaret altında bulundı.

Soñraki üç kün içinde ştab, Qırımda yañı adise yoq dep iddia etti. Amma nezaret altında bulunğan adamlarnıñ sayısı 754-kece arttı (martnıñ 23-ünde).

Rusisye tibbiy taqımları Herson ile sıñırda ve "Simferopol" ava limanında koronavirus testlerini toplay.

Martnıñ 23-ünde ştab iştirakçileri, "koronavirus kirsetilecegini" tahmin etti. Onıñ içün akimiyet, "ketirilgen" virusnıñ adamlarnıñ yaqınlarına yuqmasına yol bermemege qarar aldı, dedi Natalya Penkovskaya.

"Sert tedbirler" ve tatiller

Salı künü, martnıñ 24-ünde Qırımda birden altı koronavirus hastası aqqında haber ettiler. Böylece, yarımadada yedi adam oldı,

"Hastalanğanlarnıñ dörtü - bir qorantanıñ azalarıdır, olar Birleşken Arap Emirliginde kezintide edi ve kruiz gemisinde yaldadı. Daa eki hasta Litva ve Belgiyadan keldi", - dedi Sergey Aksönov.

Hastalanğan qırımlınen alâqada olğan 37 adam belgilendi. Olarnıñ 5-i - onıñ yaqın soylarıdır. Bazılarnı hastahanege qoydılar, başqalarnı - evge izolâtsiyağa yiberdiler.

Bir künde tibbiy nezaret altında bulunğan qırımlılarnıñ sayısı 811 adamğace arttı.

"Şimdi körecegimiz tedbirler ne qadar sert olsa ve bu vaziyetni yerine ketirmek içün ne qadar intizamlı olsaq, o qadar tez bu aldan boşanırmız. Ya da bir şey yapmay raat-raat kezsek, daa bir-bir yarım yılğa sozarmız. Vazifemiz - bu hastalıqnı başından bogmaq ve ne qadar tez olsaq, o qadar yahşı", - dedi o martnıñ 24-ünde.

Daa bir künden soñ ise, martnıñ 25-inde, Qırım Sağlıq Nazirliginiñ malümatına köre, tibbiy nezaret altında bulunğan qırımlılarnıñ sayısı biñni aştı.

Qırımnıñ rusiyeli başı çetel memleketlerden kelgen ve özüni izolâtsiya etmekten qaçınğanlarga qarşı sert tedbirlerniñ körülmesini talap etti. Vladimir Putin Rusiyede aprelniñ 5-ine qadar tatil olacağını ilân etken soñ, Sergey Aksönov "imkânı olğanlarğa" bu tarihke qadar evde qalmaga muracaat etti.

Bundan ğayrı Qırımdaki koronavirusnen küreşken stabnıñ oturışlarında iştirakcilerniñ sayısını azlaştırmağa talap etti.

"Deyirik ki, mümkün qədər az insan qapalı məkanlarda kollektiv ünsiyyət qurmalıdır, amma yenə də istisnasız olaraq hər kəsi cəlb etdi. Qərargah üzvlərinin sayını azaldın. Buna ehtiyacı olanlar gəlsin ”dedi.

O künde COVID-19 hastalığınıñ yañı adiseleri qayd etilmedi. Natalya Penkovskaya Qırımda vaziyet "kontrol" etile, dep ayttı.

Antirekordlar künü

Martnıñ 27-sinde saba yarımadada COVID-19 hastalığınıñ 7 yañı adisesi belli oldı. Bu adiselerge de "ketirilgen" deyler.

"Bütün hastalar - koronavirus hastalığı olğan memleketlerden qayttı. Olardan altısı - bir kruiz laynerinde kezingen eki qorantanıñ azalarıdır. Yani, bütün adiseler ketirilgendir", - dey Penkovskaya.
Böyleliknen, Qırımda resmiy koronavirus adiselernin sayısı on dört oldı.

Aynı şu künü Aqyar akimiyeti de ilk koronavirus hastası aqqında ilân etti. Olar beş adiseni qayd etti.

Aqyar başı Mihail Razvojayev, hastalarnıñ episi Frenkistan, Büyük Britaniya ve Cenüp-Şarqiy Asiyadan qaytqanını ayta. Olarnı şeer infektsiya hastahanesine qoydılar.

Bundan evel Aqyar akimiyeti, şeerde koronavirus infektsiyası yoq dep ayta edi. Olarnıñ malümatına köre, matrnıñ 27-sinde eki biñden ziyade adam tibbiy nezaret altında buluna. O qadar da al Qırımda tapıldı.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.