Artıq altıncı yıldır ki, Ukraina halqara topluluqnen beraberlikte öz topraq bütünlugu içün küreşe. Ya Qırımnıñ özünde ne, küreş barmı? Elbette ki, bar. Ve onıñ esas köçüricileri - qırımtatar halqı ve Ukraina tarafdarı olğan faaller. Tamam olar Rusiye propagandasına tirenip, qırımlılarnıñ fikirlerini Ukrainağa taba deñiştire.
İşte, Qırımdaki rusiyeli akimiyet, bir vaqıtları "referendum"ğa neytral ya da loyal baqqanlarğa da öz fikrini deñiştirmek içün bayağı sebep bere. Azatlıqlarnıñ bastıruvı, qırımlılarnıñ aq-uquqlarınıñ aqsımlavı, repressiyalar ve qorqu müiti, küçük ve orta biznessniñ yoq etilmesi - bütün bular, qırımlılarnı Rusiyenen beraber Qırımğa kelgen kerçeklerni red etmege mecburlay. Bu bir taraftan, başqa taraftan unutmamalıq ki, ilhaq ne qadar çoqqa sürse, Rusiyeniñ propaganda ve idealogiyası zeeri ile tolu mektep ve universitetlernen zeerlengen gençler o qadar çoq ola.
Bu yaşlar Qırımda daa ukrain akimiyet olğan serbest zamanlarda ösmedi. Olar, özüni serbest duymaq ne olğanını ve bu ne qadar emiyetli olğanını bilmey. Mına bu gençlerniñ fikirleri içün ise faaller, blogerler ve uquq qoruyıcılar küreşmek kerek, olarğa aqiqiy insan degerlerini açıp, Ukraina tarafdarlığını aşılamaq kerek. İşte, öyle de yapıla. Şu çümleden Qırım.Aqiqat populâr resursı da yardım ete. Çünki sır degil ki, ukrain matbuat Qırım faallerine öz meydançıqlarını açmay, ne yazıq.
Сегодня каждый активист в Крыму – это мирный штык Украины в борьбе с агрессором. Нельзя их терять
Amma keliñiz faaller oğrağan vaziyetni baqayıq. Afsus ki, olarnıñ alı şimdi müşkül. Olar, qırımlılar tamamınen zombileşken vatniklerge çevirilmesin dep ğayret eteler, amma siq-sıq qıta Ukraina tarafından aqsız bir munasebet köreler. Qırımda rusiye kerçeklerini tenqit etken qaç Qırım faali "Mirotvorets" saytınıñ qara cedvelinde buluna? Cevap - çoq. Yani, bir ibare ya süretke ilişip, biz qolaylıqnen tarafdarlarımıznı inkâr etemiz. Menimce, Qırım ve qırımlılar oğrunda küreşte bu muvafaqiyet taktikası degil. Özünde uzaqlaştırmaq degil, er adam içün küreşmek kerek, kollaborantlarnıñ eline itemek degil, qol uzatıp, andan çıqarmaq kerek. O zaman muvafaqiyet olacaq, o zaman Ukraina öz topraq bütünligini daa tez qaytarır.
Daa başqa bir taraf. Men de, tanış bloger ve faallerim de diqqat etti ki, bütün Kyiv toplaşuvlarına, bütün halqara meydançıqlarına Qırımdan daima aynı faal ve uquq qoruyıcılar qatnay. Amma bu pek doğru degil. O qadar belli olmayıp, amma Qırımda Ukraina tarafdarlığı içün küreşke öz büyük issesini qoşqan faalni iç olmadan bir kere davet etiñiz, o bu körüşüvden (seminar, trening, konferetsiyadan) bir qaç yılğa yetecek ilham alıp qaytır. Amma bu adamlarnı diqqatsız qaldırıp, biz ket-kete olarnı coyamız. Bugün olmasa - yarın olar kollaborantlarnıñ sürüsine qoşulır, birevlerni balbekçiler özüne çeker, başqaları öz başına küreşmekten boldurıp, özleri vazgeçir.
Yazıq ki, vaziyet böyle. Bellesem, Kyivde bunı tüşünip baqmaq kerekler, çünki bunıñ aqqında laf etilmey, amma bu gayet müimdir. Bugün Qırımda er bir faal - tecavuzcınen küreşte Ukrainanıñ tınç bir süngüsidir. Mümkün degil, olarnı coymağa mümkün degil.
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
