Keçken afta içinde ilhaq etilgen Qırımda qurtarıcılar 53 yanğınnı söndürdi ve 7 adamnı qurtardı. Bunı Rusiye FVN-niñ Qırım idaresi bildire.
"53 yanğın söndürildi, olardan 17-si - çöplük ve quru ösümliklerniñ yanmasınen bağlı ateşler. Bir afta içinde yedi adam qurtarıldı, 29 adam tahliye etildi, üç adam elâk oldı", - denile müessiseniñ beyanatında.
Bundan ğayrı, qurtarıcılar 16 kere yol qazalarında yardım etti, neticede 16 kişi qurtarıldı, üç kişi elâk oldı.
Nazirlikniñ malümatına köre, ormanlıqta eki qırdıruv operatsiyası keçirildi, olarnıñ neticesinde üç adam qurtarıldı. Suv qazaları olmadı.
Fevralniñ 13-ünde gece Kefede Galereynaya soqağında yanğın oldı, onıñ sebebinden beş qatlı evniñ 15 sakinini tahliye ettiler.
Daa evel bildirildi ki, ilhaq etilgen Qırımda yılnıñ başından berli yanğınlarda 18 adam elâk oldı, umumen bu vaqıtta yarımadada 200-den ziyade yanğın oldı.
Aqmescitte yanvarniñ 20-sinde qaravul odası yandı, neticesinde işçi elâk oldı.
Yanvarniñ 19-ında Qarasuvbazar rayonınıñ Efendiköyünde (Gruşevka) yanğında eki adam elâk oldı.
Kezlevde (Yevpatoriya) "Ozero snovideniy" SPA kompleksinde yanvarnıñ 13-ünde saba yanğın oldı. Qurtarıcılar 4 işçi ve 55 müşterini tahliye etti.
Yanvarniñ 12-sinde bazar künü Ay-Petri platosı rayonında eki qatlı tahta bina yandı. Yanğın 50 metr kârege tarqaldı. Yaralanğanlar olmadı.
