İyünniñ 10-nda saba Rusiye quvetçileri Qırımnıñ bir qaç rayonında tintüvler keçirdi. FSB malümatına köre, yarımadanıñ bir qaç sakinine qarşı cinaiy dava açıldı – olarnı Rusiyede yasaqlanğan «Hizb ut-Tahrir» teşkilâtında iştirak etkeninden şübheli dep sayalar.
«Qırım birdemligi» cemaat birleşmesiniñ malümatına köre, evleri tintilgen kişiler:
- Eldar Kantimirov (Aluşta);
- Ruslan Mesutov (Büyük Lambat (Malıy Mayak) köyü, Aluşta);
- Eskender Suleymanov (Mamaq (Stroganovka) köyü, Aqmescit rayonı);
- Riza Ömerov (Qarasuvbazar);
- babası Enver Ömerov (Qarasuvbazar);
- Lenur Halilov (Körbek (İzobilnoye) köyü, Aluşta);
- Ayder Cepparov (Zuya, Qarasuvbazar rayonı);
- Ruslan Nagayev (Küçük Özen (Maloreçenskoye), Aluşta).
Rusiye FSBsi Qırımda tintüvler keçirilgenini tasdıqladı. Rusiye quvetçileriniñ bildirgenine köre, olar Rusiyede yasaqlanğan «Hizb ut-Tahrir» teşkilâtında iştirak etkeninden şübheli sayılğan insanlarnıñ evlerinde keçirildi.
«Qayd olğan ve yaşağan yerlerinde tahqiqat tedbirleri keçirile», – dep aytıla müessiseniñ haberinde.
Qayd etile ki, cinaiy işler Aluşta ve Qarasuvbazar şeerleri, Aqmescit rayonınıñ sakinlerine qarşı açıldı. Böyle insanlarnıñ sayısı aydınlatılmay.
Ukraina uquq qoruyıcı organları Qırımda Rusiye quvetçileri keçirgen tintüvlerden sebep cinaiy tahqiqat başlattı, dep bildirdi Qırım Muhtar Cumhuriyeti Prokuraturasınıñ matbuat hızmeti.
«Ukraina Ceza kodeksiniñ 162-nci maddesiniñ 2-nci qısmındaki (mesken tiyilmemezligini bozuv) cinayet alâmetleri boyunca cinaiy tahqiqat başlatıldı», – dep aytıla haberde.
Matbuat hızmetiniñ bildirgenine köre, evleri tintilgen şahıslarnıñ tutulması tasdıqlansa, Rusiye quvetçileriniñ areketlerine uquq ceetinden kene qıymet kesilecek.
Kimler tutuldı?
Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ 8 er adam tutuldı.
Qırım.Aqiqat mühbiriniñ malümatına köre, Aluştada Ruslan Nagayev ve Eldar Kantimirov, Büyük Lambat (Malıy Mayak) köyünde Ruslan Mesutov, Körbek (İzobilnoye) köyünde Lenur Halilov, yerli din cemiyetiniñ reisi tutuldı. Halilov Aluştadaki «Hizb ut-Tahrir» bölügini qurğanında (Rusiye Ceza kodeksiniñ 205.5 maddesiniñ 1-inci qısmı) qabaatlana. Tahqiqatnıñ malümatına köre, bu bölükke Kantemirov ve Nagayev kire.
Aqmescit civarındaki Mamaq (Stroganovka) köyünde Eskender Suleymanov tutuldı.
Qarasuvbazar rayonınıñ Zuya köyünde faal Ayder Cepparov, Qarasuvbazarda Riza Ömerov tutuldı. Ömerovnıñ evinde keçirilgen tintüv vaqtında yedi aylıq yüklü apayı erte doğurmağa başladı. Bu aqta qırımlı advokat Mammet Mambetov haber etti.
«Tintüvden soñ tutulğan qarasuvbazarlı Rizanıñ ömür arqadaşı pek yaramadı. Şimdi Qarasuvbazar hastahanesinde erte doğura. Yardım kerek», – dep yazdı Mambetov Facebook saifesinde.
İyünniñ 10-nda saba yol hızmetiniñ hadimleri Rostov-na-Donuğa ketken Fatma İsmailova ve Enver Ömerovnı, Riza Ömerovnıñ qız qardaşı ve babasını, toqtattı. Enver Ömerov tutuldı.
Fatma İsmailova Aqmescitteki birinci «Hizb ut-Tahrir davasınıñ» mabüsi Rustem İsmailovnıñ ömür arqadaşı ola.
«Bu insanlardan sahte terroristler yapıla»
Aqmescit civarındaki Şumhay (Zareçnoye) köyünde qırımtatar faali Eldar Kantimirovnıñ evinde keçirilgen tintüv vaqtında Rusiye FSBsiniñ hadimleri bir qaç kitapnı aldı, dep tarif etti Kantimirovnıñ advokatı Ayder Azamatov.
«Tintüv keçirilgende tertip bar edi. Bir şey taşlamayıp ala, baqa ve yerine qoya ediler. Bazı kitaplar alındı, tahqiqatnıñ malümatına köre, olar cinaiy davanen bağlı», – dep bildirdi Azamatov.
Advokatnıñ bildirgenine köre, Kantimirovnıñ evinde tintüv keçirmek qararını çıqarğan Aqmescit Kiyev rayon mahkemesiniñ qadısı Anton Tsikurenkonıñ qararına köre, 2019 senesi iyünniñ 5-nde müvekkili ve diger şübhelilerge qarşı Rusiye Ceza kodeksiniñ 205.5 maddesine istinaden cinaiy iş açıldı.
Azamatovnıñ aytqanına köre, Kantimirovnıñ cinaiy taqibi siyasiy sebeplernen bağlı.
Qırımnıñ şimdiki vaziyetinde bu insanlardan sahte terroristlerni yapalarAyder Azamatov
«Eldar mahkemelerge faal bara, siyasiy mabüslerniñ qorantalarına yardım ete edi. Bilgenime köre, qırımtatarlarnıñ taqip etilüvine qarşı bir kişilik narazılıq aktsiyasına çıqıp, para cezasını alğan edi. O, kelişmey, dep aytmaq mümkün. Qırımnıñ şimdiki vaziyetinde bu insanlardan sahte terroristlerni yapalar», – dedi o.
Advokatnıñ qayd etkenine köre, o, tintüv vaqtında anda edi, çünki quvetçilerden evel keldi. Olar başta Kantimirovnıñ ana-babası yaşağan Aluştadaki evini tintti.
«Umumen bir qarar özü. Dört küçük balası, ömür arqadaşı ve çalışıp olamağan anası bar», – dep qoştı Azamatov.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
