Qarasuvbazarda qırımtatarı Riza Ömerovnıñ evinde keçirilgen tintüv vaqtında yedi aylıq ağır ayaqlı ömür arqadaşınıñ erte doğuruvı başladı. Bu aqta qırımlı advokat Mammet Mambetov haber etti.
«Tintüvden soñ tutulğan qarasuvbazarlı Rizanıñ ömür arqadaşı pek yaramadı. Şimdi Qarasuvbazar hastahanesinde erte doğura. Yardım kerek», – dep yazdı Mambetov Facebook saifesinde.
Daa evel qırımtatar faalleri Qırımda Rusiye quvetçileri bir qaç rayonda tintüv keçire, dep bildirdi Facebookta.
Tintüvlerden soñ Riza Ömerov, Eskender Suleymanov, Ayder Cepparov tutuldı.
İyünniñ 10-nda saba yol hızmetiniñ hadimleri Riza Ömerovnıñ qız qardaşı Fatma İsmailova ve babası Enver Ömerovnı toqtattı. Olar Rostov-na-Donuğa kete ediler. Enver Ömerov tutuldı.
Fatma İsmailova «Hizb ut-Tahrir davasınıñ» (Aqmescit gruppası) mabüsi Rustem İsmailovnıñ apayı ola.
Rusiye FSBsi iyünniñ 10-nda saba Qırımda Rusiyede yasaqlanğan «Hizb ut-Tahrir» teşkilâtında iştirak etkeninden şübheli sayılğan insanlarnıñ evlerinde tintüvler keçirile, dep bildire.
Qayd etile ki, cinaiy işler Aluşta ve Qarasuvbazar şeerleri, Aqmescit rayonınıñ sakinlerine qarşı açıldı. Böyle insanlarnıñ sayısı aydınlatılmay.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
