Qırımda Rusiye quvetçileri bir qaç rayonda tintüv keçire, dep bildire qırımtatar faalleri Facebookta.
«Qırım birdemligi» cemaat birleşmesiniñ malümatına köre, «tahqiqat tedbirleri» Aluştada Eldar Kantemirov, Aluşta rayonınıñ Büyük Lambat (Malıy Mayak) köyünde Ruslan Mesutov, Aqmescit rayonınıñ Mamaq (Stroganovka) köyünde Eskender Suleymanovnıñ (2019 senesi martnıñ 27-nde tutulğan Ruslan Suleymanovnıñ doğmuş qardaşı) evinde keçirilmekte.
Riza Ömerovnıñ evinde tintüv keçirilgeni aqqında haber etile: Qarasuvbazar, Mayakovskogo soq., 9, babası Enver Ömerov (Qarasuvbazar, Şevçenko soq., 45/1) ve Aqmescit rayonınıñ Bavurçı (Kamenka) qasabasında. Riza Ömerov tutulıp, belli olmağan yerge alıp ketirildi.
Bu malümatqa köre, Rusiye quvetçileri tintüvden soñ Qırımdaki Rusiye FSBsiniñ bölügine Eskender Suleymanovnı alıp ketti.
Daa soñra belli olğanı kibi, Eldar Kantemirov Aluştadan qayd olğan Şumhay (Zareçnoye) köyüne ketirildi. Şumhay köyü, Predgornaya soq., 17b, Aluşta rayonı adresi boyunca tintüv keçirile.
Bundan ğayrı, Aluştanıñ Körbek (İzobilnoye) köyünde yerli din cemiyetiniñ reisi Lenur Halilovnıñ evinde tintüv keçirilgeni aqqında haber etile.
Qarasuvbazar rayonınıñ Zuya qasabasında Ayder Cepparovnıñ evinde de tintüv keçirildi. Onı alıp ketkenler.
Rusiye quvetçileriniñ açıq izaatları şimdilik yoq. Qırım.Aqiqat tafsilâtlı malümat almağa tırışa.
İşğalden soñ Qırımda mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkerilip başlandı.
