Ukraina Tış işler nazirligi Rusiye FSBsiniñ Ukraina Mudafaa nazirligi Baş istihbarat idaresiniñ ve Qırımtatar Milliy Meclisiniñ «narazılıq aktsiyaları» ve Qırımdaki gaz borusında «diversiyanıñ» teşkil etilüvinen olğan alâqaları aqqında malümatını tefsir etti.
«Bu qabaatlavlarnı, hususan gaz borusındaki diversiyağa alâqamıznı Rusiye Federatsiyası tarafından yapılğan daa bir provokatsiya dep sayamız. Qanunsız tutulğan Ukraina vatandaşlarınıñ kütleviy haber vastalarında tarqatılğan «itiraf» videosı deşetli işkenceler neticesinde alındı. Bu qırımtatar ealisine qarşı repressiyalarnı gizlemek içün Rusiye işğalci repressiv organlarınıñ daa bir muvafaqiyetsiz ıntıluvı oldı», – dep ayttı jurnalistlerge Ukraina Tış işler nazirliginiñ spikeri Oleg Mıkolenko.
Bundan ğayrı, Ukraina Tış işler nazirligi Rusiyeden «qanunsız tutulğan Ukraina vatandaşlarını acele azat etmesini ve qırımtatar halqı vekillerine qarşı işkence ve taqiplerni toqtatmasını» talap etip, halqara toplulıqnı «qanunsız tutulğan Ukraina vatandaşlarınıñ Rusiye apsinden azat etilmesi içün» qoşulmasına davet etti.
Rusiye FSBsi bildirgenine köre, 2016 senesi aprel ayından itibaren Rusiye Ceza kodeksiniñ farqlı maddelerine istinaden 32 «Meclis tarafdarı» mahküm etildi, 50 «tarafdarı» cinaiy mesüliyetke çekildi, 306 «tarafdarı» memuriy mesüliyetke çekildi, 33 kişiniñ kirişi yasaqlandı, 301 prokuror tenbisi çıqarıldı ve 297 polis tenbisi oldı.
FSB, Qırımtatar Milliy Meclisiniñ Ukraina mahsus hızmetlerinen alâqada olğanına dair malümat aldı, dep haber ete.
Qırımtatar Milliy Meclisiniñ reisi Refat Çubarov Qırım.Aqiqatqa tefsirini aytıp, Rusiye quvetçileriniñ yañı qabaatlavlarını «intiqam» dep adlandırdı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
