Rusiye FSBsi bildirgenine köre, 5 yıl içinde işğal etilgen Qırımda «Meclisniñ Rusiyege qarşı 53 aktsiyasınıñ ögü alındı». Bu aqta TASS Rusiye devlet agentligi Rusiye FSBsiniñ Cemaat alâqaları merkezine esaslanıp bildire. Qırımtatar Milliy Meclisiniñ reisi Refat Çubarov Qırım.Aqiqatqa tefsirini aytıp, Rusiye quvetçileriniñ yañı qabaatlavlarını «intiqam» dep adlandırdı.
«Qırım Cumhuriyetinde Ukraina revanşist siyasetiniñ esas tarqatıcısı ve narazılıq ve separatist areketleriniñ moderatorı Qırımtatar Milliy Meclisi ola», – dep aytıla FSB haberinde.
Rusiye müessisesi, 2016 senesi aprel ayından itibaren Rusiye Ceza kodeksiniñ farqlı maddelerine istinaden 32 «Meclis tarafdarı» mahküm etildi, 50 «tarafdarı» cinaiy mesüliyetke çekildi, 306 «tarafdarı» memuriy mesüliyetke çekildi, 33 kişiniñ kirişi yasaqlandı, 301 prokuror tenbisi çıqarıldı ve 297 polis tenbisi oldı, dep bildire.
FSB, Qırımtatar Milliy Meclisiniñ Ukraina mahsus hızmetlerinen alâqada olğanına dair malümat aldı, dep haber ete.
Qırımtatar Milliy Meclisiniñ reisi Refat Çubarov Rusiye FSBsiniñ malümatını Qırım.Aqiqatqa tefsir etip, qırımtatarlar «Qırımnı işğalden qurtaruv meselesini daima kötergen küçlerden biri ola».
«Qırımtatar Milliy Meclisi «Qırım platformasınıñ» iştirakçilerinden biri ola, onı azırlağan taraflardan biri oldı. Rusiye cezalandırıcıları «Qırım platforması» içün intiqam alalar, qırımtatarlardan başladılar, çünki olar Qırımda reine oldı. Cezalandırıcı organlar qırımtatarlarnıñ temsiliy organını itibardan tüşürmek içün olarğa kerek olğan şeyler uydura», – dedi Çubarov.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina Tış işler naziri Dmıtro Kuleba sentâbrniñ 6-nda Ukrainanı ziyaret etken Amerika kongressmenlerine Qırımda keçirilgen yañı tintüv ve tutuvlar aqqında tarif etip, olarnı yarımadada basqılarnı toqtatmaq maqsadınen Kremlge qarşı basqı quvetleştirüvde yardım etmelerine çağırdı.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
