Link açıqlığı

Saatnıñ esas haberi

Cemilevniñ apayını taşığan aydavcını Rusiye FSBsi idaresinde eziyetlediler – aq-uquq qorçalayıcısı


Qırımtatar halqınıñ lideri Mustafa Cemilevniñ apayını taşığan aydavcı Ahtem Mustafayevni Rusiye FSBsiniñ Bağçasaraydaki idaresinde eziyetlediler. Bunı iyül 6-da Qırım.Aqiqatqa İnsan aqları boyunca Qırım alâqa gruppasınıñ koordinatorı Abdureşit Cepparov bidlirdi.

Onıñ aytqanına köre, iyün 28-de Mustafayevniñ evi tintilgende o, özü anda yoq edi. Lâkin onı tapıp, maşinağa oturttı ve başına çuval keçirdiler.

Aq-uquq qorçalayıcısı: «Maşinada, başında çuval ile onı, soñundan añlağanına köre, Rusiye FSBsiniñ Bağçasaraydaki idaresinde alıp kettiler. Ondan soñ onıñ üstünde «çalıştılar». Amma bunı biz böyle aytamız, aqiqatta ise onı urdı, eziyetledi, oña qarşı deşetli şeyler yaptılar… Ondan soñ onı Aqmescitke alıp kettiler. Ondan soñ qorqutuv başlandı: sen bizde mında coyulacaqsıñ, saña, qorantaña, balalarıña bir şey olur ve ilâhre. Bütün bularnı başından keçirmege mecbur oldı», – dep ikâye etti.

Cepparovnıñ aytqanına köre, ahır-soñu Mustafayevni «iç bir statussız, ne protokol, ne de kâğıt imzalatıp» yiberdiler.

Aq-uquq qorçalayıcısı: «Onda şaat, qabaatlanğan ya da şübheli statusı yoq. Onı, sadece «biz sennen endiden soñ sıq-sıq körüşecekmiz» deye tenbilep, yiberdiler», – dep qayd etti.

Daa evel Cepparov, Mustafayevniñ Ukrainanıñ qıtadaki qısmına çıqıp ketkenini bildirdi.

Bu hususta daa tafsilâtlı malümatnı Qırım.Aqiqatnıñ «Cemilev ailesiniñ şoföri FSBniñ qolunda ve müftige ait evniñ tutaştırılması boyunca cinaiy iş» materialında oquñız.

İyün 29-da advokat Edem Semedlâyev, iyün 28-de Bağçasaraydaki tintüvden soñ yaqalanğan ve daa soñra sorğulanıp yiberilgen Ahtem Mustafayevniñ, Rusiye FSBsi tarafından ekstremizmde qabaatlanğan Erol Veliyev işi boyunca şaat olaraq keçkenini bilidrdi.

İyün 28-de qırımtatar faaliyetçisi Zair Smedlâyev, Bağçasarayda qırımtatar halqınıñ lideri Mustafa Cemilevniñ apayı Safinarnı taşığan aydavcı Ahtem Mustafayevniñ evi tintilgenini bildirdi. Daa soñra telükesizlik hadimleri Ahtemni belli olmağan tarafqa alıp ketti, dep bildirilgen edi.

Rusiye FSBsi, sanki Qırımda, Ukraina Yuqarı Radasınıñ deputatı Mustafa Cemilevnıñ yardımcısı Erol Veliyev tarafından «Refat Çubarovnıñ emiri boyunca ve SBUnıñ qol tutuvı ile» meydanğa ketirilgen ekstremist gruppasınıñ areketini toqtatqanını, bildirdi.

Rusiyeniñ mahsus hizmeti tarafından iddia etilgenine köre, «Harkivde teşkil etilgen gruppağa Veliyevden ğayrı sabıq boksçu sprotçular Steşenko ve Tretyakov kirdiler».

FSBde, «ekstrimist toplulığınıñ azaları 2018 senesiniñ yanvarinde, tutaştırıcı qarışma ile toldurılğan şişelerni qullanıp, Qırım müftisi Emirali Ablayevniñ evini tutaştırdılar», deyler.

FSB, Steşenkonıñ 2018 senesiniñ aprelinde «Qırımğa kirgende» yaqalanğanını ve «anda Veliyev tarafından provokatsiyalarnı azırlamaq ve amelge keçirmek içün yollanılğanını» iddia ete. Rusiye Veliyev ve Tretyakovğa qarşı qabaatlavnı ğiyabiy şekilde çıqardı, olar «federal qıdırıluv cedveline kirsetildi».

XS
SM
MD
LG