Qırımtatar halqınıñ lideri Mustafa Cemilevniñ apayını taşığan aydavcı Ahtem Mustafayev ilhaq etilgen Qırımdan Ukrainanıñ qıtadaki qısmına çıqıp ketti. Bunı iyül 6-da Qırım.Aqiqatqa, çıqıp ketüvniñ temin etilmesinde yardım etken İnsan aqları boyunca Qırım alâqa gruppasınıñ koordinatorı Abdureşit Cepparov ayttı.
Aq-uquq qorçalayıcısı: «O, şimdi Ukrainanıñ qıtadaki territoriyasında buluna. Biz oña çıqıp ketmege yardım ettik. Menim fikrimce, o, endi azatlıq avasınen tolu nefes aladır. Ve bundan soñ endi o, oña qarşı yapılğan şeyler aqqında bütün nasip olğan seviyelerde ikâye etecek. Ondan soñ işke advokatlar kirecek, ve Ahtem Mustafayev boyunca faal işler alıp barılacaq», – dedi.
Bu hususta daa tafsilâtlı malümatnı Qırım.Aqiqatnıñ «Cemilev ailesiniñ şoföri FSBniñ qolunda ve müftige ait evniñ tutaştırılması boyunca cinaiy iş» materialında oquñız.
İyün 29-da advokat Edem Semedlâyev, iyün 28-de Bağçasaraydaki tintüvden soñ yaqalanğan ve daa soñra sorğulanıp yiberilgen Ahtem Mustafayevniñ, Rusiye FSBsi tarafından ekstremizmde qabaatlanğan Erol Veliyev işi boyunca şaat olaraq keçkenini bilidrdi.
İyün 28-de qırımtatar faaliyetçisi Zair Smedlâyev, Bağçasarayda qırımtatar halqınıñ lideri Mustafa Cemilevniñ apayı Safinarnı taşığan aydavcı Ahtem Mustafayevniñ evi tintilgenini bildirdi. Daa soñra telükesizlik hadimleri Ahtemni belli olmağan tarafqa alıp ketti, dep bildirilgen edi.
Rusiye FSBsi, sanki Qırımda, Ukraina Yuqarı Radasınıñ deputatı Mustafa Cemilevnıñ yardımcısı Erol Veliyev tarafından «Refat Çubarovnıñ emiri boyunca ve SBUnıñ qol tutuvı ile» meydanğa ketirilgen ekstremist gruppasınıñ areketini toqtatqanını, bildirdi.
Rusiyeniñ mahsus hizmeti tarafından iddia etilgenine köre, «Harkivde teşkil etilgen gruppağa Veliyevden ğayrı sabıq boksçu sprotçular Steşenko ve Tretyakov kirdiler».
FSBde, «ekstrimist toplulığınıñ azaları 2018 senesiniñ yanvarinde, tutaştırıcı qarışma ile toldurılğan şişelerni qullanıp, Qırım müftisi Emirali Ablayevniñ evini tutaştırdılar», deyler.
FSB, Steşenkonıñ 2018 senesiniñ aprelinde «Qırımğa kirgende» yaqalanğanını ve «anda Veliyev tarafından provokatsiyalarnı azırlamaq ve amelge keçirmek içün yollanılğanını» iddia ete. Rusiye Veliyev ve Tretyakovğa qarşı qabaatlavnı ğiyabiy şekilde çıqardı, olar «federal qıdırıluv cedveline kirsetildi».
