İyün 28-de Bağçasaraydaki tintüvden soñ yaqalanğan ve daa soñra sorğulanıp yiberilgen Ahtem Mustafayev, Rusiyeniñ FSBsi tarafından ekstremizmde qabaatlanğan Erol Veliyevniñ işi boyunca şaat olaraq keçe. Bunı iyün 29-da Qırım.Aqiqatqa advokat Edem Semedlâyev bilidrdi.
«Bilgenim qadar, o, Aleksandr Steşenko ve Erol Veliyevniñ işi boyunca keçe. Onı bütün kün Bağçasaraydaki FSBde tutqan soñ aqşamğa taba FSBniñ Aqmescitteki esas idaresine ketirip, anda da sorğuladılar. Mence, bu iş boyunca şimdi pek çoq insanğa «toqunacaqlar», çoq evni tintecekler: bu iş boyunca bağlı olğanlarnı da, olmağanlarnı da keçirecekler. Qırımtatarlardan ekstremistler yapacaqlar», – dedi o.
Advokat, Ahtem Mustafayevniñ sorğulanğanı, onıñ Mustafa Cemilevniñ apayını taşığanı ile bağlı ola bilir, dep saya.
Ahtem Mustafayev Bağçasarayda yapılğan tintüv ve yaqalanuvdan soñ Rusiye telükesizlik hadimleri tarafından Aqmescitte yiberildi.
İyün 28-de qırımtatar faaliyetçisi Zair Smedlâyev, Bağçasarayda qırımtatar halqınıñ lideri Mustafa Cemilevniñ apayı Safinarnı taşığan aydavcı Ahtem Mustafayevniñ evi tintilgenini bildirdi. Daa soñra Ahtemniñ telükesizlik hadimleri tarafından belli olmağan tarafqa alıp ketilgeni bildirildi.
Rusiye FSBsi, sanki Qırımda, Ukraina Yuqarı Radasınıñ deputatı Mustafa Cemilevnıñ yardımcısı Erol Veliyev tarafından «Refat Çubarovnıñ emiri boyunca ve SBUnıñ qol tutuvı ile» meydanğa ketirilgen ekstremist gruppasınıñ areketini toqtatqanını, bildirdi.
Rusiyeniñ mahsus hizmeti tarafından iddia etilgenine köre, «Harkivde teşkil etilgen gruppağa Veliyevden ğayrı sabıq boksçu sprotçular Steşenko ve Tretyakov kirdiler».
FSBde, «ekstrimist toplulığınıñ azaları 2018 senesiniñ yanvarinde, tutaştırıcı qarışma ile toldurılğan şişelerni qullanıp, Qırım muftisi Emirali Ablayevniñ evini tutaştırdılar», deyler.
FSB, Steşenkonıñ 2018 senesiniñ aprelinde «Qırımğa kirgende» yaqalanğanını ve «anda Veliyev tarafından provokatsiyalarnı azırlamaq ve amelge keçirmek içün yollanılğanını» bildire. Rusiye Veliyev ve Tretyakovğa qarşı qabaatlavnı ğiyabiy şekilde çıqardı, olar «federal qıdırıluv cedveline kirsetildi».
