Qırımtatar halqınıñ lideri Mustafa Cemlevniñ apayı Safinarnıñ aydavcısı Ahtem Mustafayev, iyün 28 sabasında yaqalandı ve belli olmağan tarafqa alıp ketildi. Bunı «Qırım birdemligi» Facebooktaki saifesinde bildire.
Qırım advokatı Emil Kurbedinovniñ aytqanına köre, onıñ zenaatdaşı Edem Semedlâyev, Mustafayevniñ ailesine uquqiy yardım bermek içün Bağçasaraydaki tintüvge ketti.
Al-azırda yarımadadaki Rusiye uquqqoruyıcıları vaziyetni izalamaylar.
Daa evel qırımtatar faaliyetçisi Zair Smedlâyev, iyün 28-de Bağçasarayda qırımtatar halqınıñ lideri Mustafa Cemlevniñ apayı Safinarnıñ aydavcısı Ahtem Mustafayevniñ evi tintilgenini bildirdi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
