Link açıqlığı

Saatnıñ esas haberi

Advokat: Qırım blogerini psihiatriya hastahanesine yerleştirilmesi – cezalayıcı psihiyatriyadır


Nariman Memedeminov, arhiv fotosureti
Nariman Memedeminov, arhiv fotosureti

Qırımda terrorizmniñ propagandasından şübheli sayılğan qırımtatar blogeri Nariman Memedeminovnıñ psihiatriya hastahanesine yerleştirilmesi, Rusiyede cezalayıcı psihiatriyanı qullanuvnıñ açıq bir körünişidir. Bu fikirni advokat Emil Kurbedinov «Qırım birdemligi»niñ oturışuvı esnasında ifade etti.

Kurbedinov: «2014 senesinden başlap, «cezalayıcı psihiatriya» añlamı Qırım tarihına kirip temelli şekilde yerleşti. Er şey (Qırımtatar Milliy Meclisi muavini – QA) İlmi Umerovdan başlandı. Ondan soñ «Hizb ut-Tahrir işleri» boyunca qabaatlanğanlarnıñ bir çoqu bundan keçti. Vatandaş jurnalisti Nariman Memedeminovnı psihiatriya hastahanesine 20 künge oturttılar. Men bunı, Sovet Birligi ameliyatınıñ adım-adım tatbiq etilmesi, dep sayam. Halqara teşkilâtlar buña hususiy bir diqqat ayırmaq kerekler», – dedi.

Onıñ aytqanına köre, tahqiqat, Memedeminovnıñ teşkerüv içün psihiatriya hastahanesine keçirilmesini, «soñundan cevapkârlıqtan qaçmaması içün» aqıl sağlığı teşkerilmek kerek, dep esaslandırdı.

Advokat Edem Semedlâyev, Memedeminov ve Server Mustafayevniñ cinaiy taqip etilmesi – «Qırım birdemligi» cemiyet birleşmesi iştirakçileriniñ faalligini toqtatmaq teşebbüsidir, dedi.

Semedlâyev: «Olarnıñ tevqifleri – «Qırım birdemligi»ne yapılğan tazyiqtan başqa bir şey degil. Olar onıñ eñ faal iştirakçileri edi. Ve neticede bunen keder ettiler. Nariman Memedeminovğa ait (ve derc etilmesi, terrorizmniñ propagandasında qabaatlanğanınıñ sebebi olğan – QA) videoroliklerniñ ekspertizası daa 2015 senesinde azırlanğan edi. Lâkin Nariman uquqqoruyıcı organları ve ükümet içün kerçek bir telüke olmağance o, yata edi. Ekinci Bağçasaray gruppası boyunca işni 7-8 ay evel başladılar ve, ne içündir, altı kişiniñ kim olğanını birden bilip, Servr Mustafayev ile Edem Smailovnı yalıñız yaqında tanıdılar. Men aniden olğan şeylerge inanmayım», – dedi

İyün 30-da vatandaş faaliyetçisi Nariman Memedeminovnı psihiatriya hastahanesine yerleştirdiler. Bildirilgenine köre, o, anda eñ az 20 kün bulunacaq.

Mayıs 15-te Rusiyeniñ kontroli altında olğan Aqmescitteki Kiyevskiy rayon mahkemesi, terrorizmniñ propagandasında qabaatlanğan qırımtatar faaliyetçisi, vatandaş jurnalisti Nariman Memedeminovğa tevqifni dört ayğa uzattı. Memedeminov tahqiqat izolâtorında ağustos 15-ke qadar qalacaq.

Martta Bağçasaray rayonında Rusiye telükesizlik ve polis hadimleri Nariman Memedeminovnıñ evini tinttiler. Bundan soñ mahkeme Memedeminovnı tevqif etti.

Mart 23-te QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.

Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaqaqqınıñ bozuluvı» dedi.

XS
SM
MD
LG