Tahqiqat komitetiniñ Rusiyeniñ kontroli altında olğan Qırım boyunca idaresi qırımtatar milliy areketi veteranı Veciye Kaşkanıñ elâk olması boyunca cinaiy işniñ açılmasını tekrar red etti.
Bunı Rusiye advokatı Nikolay Polozov Facebookta bildirdi.
Advokat, 2018 senesiniñ fevralinde tahqiqat, Rusiye Cinaiy kodeksiniñ 105-nci maddesiniñ 1-nci qısmı (öldürüv), 109-ncı maddesiniñ 1-nci qısmı (muqaytsızlıq ile öldürüv) ve 111-nci maddeniñ 4-nci qısmında (zarar körgenniñ ölümine ketirgen sağlıqqa qasten ağır zarar ketirüv) qayd etilgen vaqialarnıñ olmağanına esaslanıp, Veciye Kaşkanıñ ölümi vaqiası boyunca cinaiy işniñ açılmasını red etti, dep bildirdi.
Advokat: «Tahqiqatçı, hulâsasını mahkemeniñ tibbiy ekpertizasınıñ neticeleri esasında çıqarıp, bu cinaiy işlerniñ açılmasını red etkeniniñ esası olaraq Veciye Kaşkanıñ ölümi tabiiy sebeplerden olğanını kösterdi. Men teşkerüv materialları ve şu cümleden mahkemeniñ tibbiy ekspertizasınıñ neticeleri ile tanışuv aqqında ariza bergen soñ qarar lâğu etildi ve teşkerüv ğayrıdan başlandı», – dep bildirdi.
Polozov, teşkerüv esnasında bir qaç ekspretizanıñ yapılğanını, ve ondan soñ tahqiqatçınıñ cinaiy işniñ açılmasını red etüv boyunca yañı qarar çıqarğanını, qayd etti. Ondan ğayrı tahqiqat, «şahıs tarafından ihtisasiy vazifelerniñ keregi kibi eda etilmemesi neticesinde muqaytsızlıq ile ölümge sebepçi oluv» maddesi boyunca acele tibbiy yardımnıñ ekimine qarşı cinaiy iş açıp oturmadı, dep qayd etti.
Polozov: «Kaşkanıñ elâk oluv şartlarınıñ ögrenilmesini devam ettirmek içün bundan evel keçirilgen bütün mahkemeniñ tibby ekspertizalarını ve tahqiqat tarafından teşkerüv materiallarında toplanğan diger vesiqalarnı büyük diqqatnen, mutehassıslarnıñ celp etilmesi ile ögrenilmek kerek. Lâkin fevral ayından berli bu materialğa irişmekniñ çaresi yoq. Mayısqa qadar o, tahqiqatçınıñ, ğayrıdan başlanğan teşkerüv boyunca tahqiqattan evelki işlevinde buluna edi ve endi aman-aman bir aydan berli Qırımdaki Rusiyeniñ prokuraturasında buluna», – dep yazdı.
O, teşkerüv materialınen tanış olmaq içün tahqiqatçığa ğayrıdan ariza berdi.
Advokat: «Kaşkağa dair işniñ tahqiqat ceryanını sozmaq içün Rusiye memuriyeti tarafından yapılğan protsessual ve bürokratik ayın-oyunlarğa baqmadan, o, bütün şartlar soñ derece tayin etilmegence devam etecek», – dep qayd etti.
Fevralniñ başında Polozov, 2017 senesinde Qırımda Veciye Kaşkanıñ elâk oluvını mustaqil surette tahqiq etmege başladı. Onıñ aytqanına köre, Veciye Kaşkanıñ ölümi – «onı qanunsız olaraq yaqalağan Rusiye telükesizlik hadimleri tarafından adden aşırı ve ğayrı-mutenasip quvet qullanuvnıñ neticesidir».
Noyabr 23-te Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olarnı Türkiye vatandaşından qorquzıp para alacaq olğanlarında qabaatladılar. Rusiye telükesizlik hadimleri tarafından yapılğan bu yaqalav esnasında qırımtatar milliy areketiniñ veteranı Veciye Kaşka yaramadı, qadın vefat etti.
Ukrainanıñ qıtadaki qısmında bulunğan QMC prokuraturası, qanunsız tintüvler, yaqalanuvlar ve qırımtatar milliy areketiniñ veteranı Veciye Kaşkanıñ ölümi vaqiası boyunca cinaiy işniñ alıp barılmasını başladı.
Veciye Kaşka – qırımtatar milliy areketiniñ veteranı. O, 1934 senesinde Aluştanıñ yanındaki Üsküt (şimdi Privetnoye) köyünde doğdı. Qırımtatar halqı 1944 senesinde sürgün etilgen soñ Veciye Kaşka qorantasınen Özbekistanda yaşadı. 50-nci yıllarda o, aqayı Bekirnen beraber qırımtatar milliy areketine qatıldı.
