Link açıqlığı

Saatnıñ esas haberi

QMC Prokuraturası Veciye Kaşkanıñ ölümini «qastlı öldürüv» olaraq tahqiq ete


QMC Prokuraturası qanunsız tintüvler, yaqalavlar ve qırımtatar milliy areketiniñ veteranı Veciye Kaşkanıñ ölümi vaqiaları boyunca cinaiy işler açtı. Muessiseniñ matbuat haberi bildirgeni kibi, Veciye Kaşkanıñ ölümi vaqiası boyunca «qastlı öldürüv» maddesine binaen cinaiy iş açıldı.

«Noyabrniñ 23-nde Qırım toprağında qanunsız surette meydanğa ketirlgen organlarnıñ vekilleri, evelden bir grup şahıslarnen sözleşip, silâ qullanacaqları ile qorqutaraq qırımtatar milliy areketiniñ veteranı Veciye Kaşkanı qanunsız olaraq azatlıqtan marum etmege tırıştılar. Bunıñ neticesinde o yaramadı. Acele yardım maşinası zarar körgen qadınnı alğan soñ, bu qadın, hastanege barmadan öldi», – denile bildirüvde.

Ondan ğayrı, qırımtatar faaliyetçileri ve bu cümleden Bekir Degermenci, Qurtseyit Abdullayev, Asan Çapuh, Ruslan Trubaç ve Kâzim Ametovnıñ evlerindeki tintüvleri ve mahsus vastalarnıñ qullanılması ile yapılğan yaqalanuvları içün «qanunsız olaraq azatlıqtan marum etüv» ve «evniñ toqunılmazlığını bozuv» maddeleri boyunca cinaiy tahqiqatlar başlandı.

Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatar faaliyetçilerini yaqaladılar. FSB yaqalanğanlarnı Qırımtatar Milliy Meclisiniñ azaları olaraq kösterdi. Qırımtatar halqınıñ temsiliy organında bu malümat red etildi.

Bir grup qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.

İşğal etilgen Qırımdaki Rusiye FSBsi, yaqalanğan faaliyetçilerni, Türkiye vatandaşından «hususan büyük miqdarda mal-mülk veya para talap etüv»de qabaatlay.

Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde sıq-sıq tintüvler yapıla.

Ukraina ve halqara cemaatçılığı defalarca Rusiyeni, ilhaq etilgen Qırımdaki taqiplerini toqtatmağa davet ettiler.

XS
SM
MD
LG