Qırımtatarlarnıñ yaqalanuvından soñ Aqmescitte qırımtatar milliy areketiniñ veteranı Veciye Kaşka ayatınıñ 83-nci yılında vefat etti.
Bunı, hastahanedeki menbalarğa sıltav etip, Azatlıq Radiosınıñ muhbiri bildirmekte. Bu haber qırımtatar faaliyetçisi Mumine Saliyeva tarafından tasdiqlana.
«Veciye qartana bu dünyanı terk etti. Yazam da, inanmayım. Uyğun sözler tapalmayım, cemaat…», – dep yazdı Saliyeva Facebookta.
Qırım kütleviy haber vastaları, «keçirgen stress neticesinde 82 yaşlı qadın vefat etti» şeklinde malümat bereler. «RİA Novosti», vefat etken qadınnıñ adı Veciye Kaşka edi, dep bildire.
Daa evel, Aqmescitniñ merkezinde qırımtatar faaliyetçileriniñ bir grubu yaqalanğan vaqtında qırımtatar milliy areketiniñ veteranı Veciye Kaşkanıñ yaramağanı belli oldı. Onı bu adise yüz köstergen yerinden «acele yardım» alıp ketti.
İlhaq etilgen Aqmescitte noyabrniñ 23-nde kündüz yerli kafede üç qırımtatar faaliyetçisi yaqalandı. Qırım kütleviy haberler vastalarınıñ malümatına köre, telükesizlik hadimleri yaqalanğanlarnı Türkiye vatandaşından «hususan büyük miqdarda mal-mülk veya para talap etüv»de qabaatlaylar.
Azatlıq Radiosı muhbiriniñ bildirgenine köre, Bekir Degermenci, Asan Çapuh ve Kâzim Ametov tevqif etildi.
Qırımtatar Milliy Meclisiniñ azası Gayana Yüksel, noyabrniñ 23-nde Aqmescitniñ merkezinde tevqif etilgen üç qırımtatar faaliyetçisi Milliy Meclisniñ azaları degil, deye bildirdi.
Rusiye telükesizlik hadimleri tarafından şimdilik buña dair izaat berilmedi.
Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde sıq-sıq tintüvler yapıla.
