Kremlniñ kontroli altında olğan Aqyar şeer mahkemesi Aqyardaki «Hizb ut-Tahrir işi» figurantı Enver Seytosmanovnıñ tevqif etilmesi aqqında qararını quvette qaldırdı. Bunı mayıs 24-te Qırım.Aqiqat muhbiri bildire.
Seytosmanovnıñ imayesi ev apisi soradı, lâkin akem Seytosmanovnı tahqiqat izolâtorında iyül 9-ğa qadar qaldırdı.
Advokat Sergey Legostov: «Enverde alından şikâyet yoq. Bu künlerde ketirilgen aş paketini alğanını ayttı», – dep ikâye etti.
Enver Seytosmanovnı Rusiye Cinaiy kodeksiniñ 205.5 maddesiniñ 2-nci qısmı boyunca «Terroristik teşkilâtnıñ faaliyetinde iştirak etüv»de qabaatlaylar. Rusiye telükesizlik hadimleri ağa-qardaş Ernes ve Enver Seytosmanovlarnı mayıs 10-da Aqyarnıñ Balıqlava rayonındaki Hayto (Tılovoye) köyünde, anda yapılğan tintüvlerden soñ yaqaladılar.
Daa soñra Ernesni yiberdiler. Enverge cinaiy işniñ açılması boyunca qararnı taqdim ettiler. Ertesi künü Rusiyeniñ kontroli altında olğan Aqyarnıñ Leninskiy rayon mahkemesi Enver Seytosmanovnı tevqif etti.
Mevzuğa dair: Terrorizm şübhesi ile parmaqlıqlar artında: daa bir qırımlı «Hizb ut-Tahrir işi» boyunca tevqif etildi»
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olarnıñ diniy alâmetke köre taqip etilgenlerini tüşüneler. Advokatlar, Rusiye uquqqoruyıcı organları tarafından bu iş boyunca taqip etilgenlerniñ esasen qırımtatarlar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
