Link açıqlığı

Saatnıñ esas haberi

Seytosmanovlar ağa-qardaştan biri, Ernes, ağası Enverniñ «işi» boyunca şaat sıfatında keçecek. Bunı o, mayıs 10-da Qırım.Aqiqat muhbirine bildirdi.

Ernes, Seytosmanovlarnıñ evindeki tintüvniñ tafsilâtlarını bildirdi.

Ernes tintüv aqqında: «Olar qararnen 6 kişi, üstlerinde tanıtıcı belgisiz, balaklavalı edi. Qapı kilitli degil edi. Ağamnen ekimiz işke çıqmağa azırlana edik», – dep ikâye etti.

Onıñ aytqanına köre, tintüv vaqtında bir qaç kitap, planşet ve telefon musadere etildi. Sorğudan soñ Ernesni serbest bıraqıp, Enverniñ Rusiye Cinayet kodeksiniñ 205.5 maddesiniñ 2-nci qısmı (Rusiye qanunlarına muvafıq olaraq terroristik tanılğan teşkilâtnıñ faaliyetinde iştirak etüv) boyunca qabaatlanğanını bildirdiler. Enver Seytosmanov muvaqqat tutuluv izolâtorında bulunacaq.

Tintüv vaqtında evde bulunğan anaları Gülnaranı, onıñ yaşağan yeri olğan Seyitler (Nijnegorskiy) rayonındaki Sadovoye köyüne alıp kettiler. Onıñ evi de tintildi. Gülnara Seytosmanovanıñ aytqanına köre, ondan bir şey alınmadı, dep bildire Ernes.

Mayıs 10 sabasında Aqyarnıñ Balıqlava rayonındaki Hayto (Tılovoye) köyünde tintüvler yapılğan soñ Ernes ve Enver Seytosmanovlarnıñ yaqalanuvı aqqında bildirildi. Daa soñra Rusiye telükesizlik hadimleri tarafından ihtimal ile üç kişi yaqalanğanı belli oldı. Ondan soñra da Ernest ve Enver Seytosmanovlarnıñ Rusiye FSBsiniñ şubesine alıp ketilgeni ve onıñ adresi belli olmağanı aqqında belli oldı.

Advokat Emil Kurbedinov, Aqyar civarında yaqalanğanlarnıñ Aqyardaki «Hizb ut-Tahrir işi» boyunca Rusiyede mahküm etilgen Nuri Primovnıñ yaqın soyları olğanını tasdiqladı.

Rusiye telükesizlik hadimleri tarafından bu hususta açıq menbalarda berilgen izaatlar yoq.

2017 senesiniñ sentâbrinde Rostov-na-Donu şeerindeki Şimaliy Kavkaz okrugınıñ arbiy mahkemesi uküm çıqardı. Oña binaen «Hizb ut-Tahrir işi» boyunca qabaatlanğan Aqyar sakinleri Ferat Sayfullayev, Rustem Vaitov ve Nuri Primovğa umumiy rejimli tertipke qoyucı koloniyada beşer yıl berildi.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ diniy alâmetke köre taqip etilgenlerini tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenlerniñ esasen qırımtatarlar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd ete.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.

XS
SM
MD
LG