Link açıqlığı

Saatnıñ esas haberi

Aqyar civarındaki tintüvler: Rusiye telükesizlik hadimleri ihtimal ile üç kişini yaqaladı


Aqyarnıñ Balıqlava rayonındaki tintüv vaqtında Rusiye telükesizlik hadimleri ihtimal ile üç kişini – doğmuş qardaşlar Ernest ve Enver Seytosmanovlar ve olarnıñ anası Gülnaranı yaqaladı. Bunı mayıs 10-da Qırım.Aqiqatqa «Qırım birdemligi» cemiyet birleşmesiniñ faaliyetçisi Server Mustafayev bildirdi.

Mustafayev: «Mesele şu ki, yigitler evlenmegen olıp, bir evde yaşay ediler. Aqşam olarğa anası keldi. Tafsilâtlı malümat yoq: yigitlerniñ ekisini de alıp kettiler, ve anaları da yoq. Biz, olarnıñ alıp ketilgen yerini tayin etmege areket etemiz», – dedi.

Onıñ aytqanına köre, olar, yaqalanğanlarnıñ bulunğan yerini tayin etken soñ, yaqalanuvnıñ tafsilâtlarını tayin etsinler deye, advokatlarnen bağlanacaqlar.

Mayıs 10 sabasında Aqyarnıñ Balıqlava rayonında tintüvler yapılğan soñ eki qırımtatar, ağa-qardaş Ernes ve Enver Seytosmanovlar yaqalandı. Qırımtatar faaliyetçileriniñ malümatına köre, olar Rusiyede Aqyardaki «Hizb ut-Tahrir işi» boyunca mahküm etilgen Nuri Primovnıñ yaqın soyları ola.

Qırım.Aqiqat adiseniñ tafsilâtlarını ögrene. Rusiye telükesizlik hadimleri şimdilik bu hususta izaat bermedi.

2017 senesiniñ sentâbrinde Rostov-na-Donu şeerindeki Şimaliy Kavkaz okrugınıñ arbiy mahkemesi uküm çıqardı. Oña binaen «Hizb ut-Tahrir işi» boyunca qabaatlanğan Aqyar sakinleri Ferat Sayfullayev, Rustem Vaitov ve Nuri Primovğa umumiy rejimli tertipke qoyucı koloniyada beşer yıl berildi.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ diniy alâmetke köre taqip etilgenlerini tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenlerniñ esasen qırımtatarlar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd ete.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.

XS
SM
MD
LG