Mahkemeniñ Nariman Memedeminovğa dair qararı Qırımda vatandaş faaliyetçileri ve jurtalistlerine, olarğa qarşı tazyiqnıñ toqtatılmaycağını köstere. Bu fikirni advokat Edem Semedlâyev, imayesi altında olğanğa tevqifniñ uzatılması neticesinde boyunca Qırım.Aqiqat içün bergen izaatlarında ifade etti.
Advokat: «İmaye ve Nariman özü mahkemeniñ oña tevqifniñ uzatılmasına dair bugünki qararına Qırımda vatandaş jurnalistikasına tazyiq etüv, dep qıymet kese. Narimannıñ musulman, qırımtatar ve bunıña ilâve olaraq bir de jurnalist olğanı, tahqiqatnı böyle qararlarnı qabul etmege ve insannı terrorizmniñ propagandası kibi ağır maddeler boyunca qabaatlamağa aveslendire. Ondan ğayrı, bu, diger qırımtatar jurnalistlerine şimdiki vaziyette böyle bir havflı işnen oğraşmamaları içün bir işarettir. Lâkin Narimannıñ mahkemede ifadelegen noqtaiy-nazarı, repressiyalarnıñ artması ile Qırımda faaliyetçilik ve vatandaş jurnalistikası kibi adiseniñ inkişaf etecegini açıqtan köstere», – dep saya.
Daa evel Rusiyeniñ kontroli altında olğan Aqmescitniñ Kyivskiy rayon mahkemesi qırımtatar faaliyetçisi, vatandaş jurnalisti Nariman Memedeminovğa tevqifni dört ayğa uzattı. Memedeminov tahqiqat izolâtorında ağustos 15-ke qadar qalacaq.
Mart 22-de Rusiye telükesizlik ve uquqqoruyıcı organlarnıñ hadimleri Bağçasaray rayonında Nariman Memedeminovnıñ evini tinttiler. Bundan soñ faaliyetçi Aqmescitteki Rusiye FSBsi idaresine sorğuğa alıp ketildi. Mart 23-te mahkeme Memedeminovnı mayıs 16-ğa qadar tevqif etti .
Mart 23-te QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun buzuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina jurnalistleriniñ milliy birligi (UJMB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve kenişletmek aqqınıñ bozuluvı» dedi.
Ukraina TİNi vatandaş faaliyetçisiniñ yaqalanmasını taqbih etip, ilhaq etilgen Qırımdaki Rusiye ukümetinden Nariman Memedeminovnıñ azat etilemsini talap ete.
