Ukraina Yuqarı Radasınıñ İnsan aqları boyunca vekili Lüdmila Denisova, rusiyeli zenaatdaşı Tatyana Moskalkova ile telefon laqırdısında, Aqmescit tahqiqat izolâtorında bulunğan Aqmescitteki «Hizb ut-Tahrir işi» figurantı Uzeir Abdullayevda sağlıq vaziyetiniñ birden fenalaşqanı aqqında malümatnı teşkermesini rica etti.
Ukraina ombudsmeniniñ saytı bildirgeni kibi, Denisova Moskalkovadan «kerekli çareler körmek ve bu işniñ vaziyetini bildirmek»ni rica ete.
Moskalkovanıñ aytqanına köre, bunıñ arfesinde Aqmescitteki 1-nci nomeralı tahqiqat izolâtorınıñ rehberi, «Uzeir Abdullayevniñ anası ve qız qardaşınen körüşti, ve bunıñ kibi de, yaqalanğannen şahsen suhbet keçirdi. Uzeir iç bir türlü şikâyet ifade etmedi», dep qayd etile.
Ondan ğayrı, Abdullayev «tibbiy teşkerüvden keçirildi, tolu kölemde tedaviylene ve anasınıñ muracaatı boyunca, damar cerrahınıñ mesleatını almaq içün mayıs 4-te şeer hastahanesine avuştırılacaq», dep bildirile.
Aprel 30, bazarertesi künü Abdullayevniñ anası, tahqiqat izolâtorında bulunğan oğlunda bir qaç künden berli yüksek sıcağı, ayağında şişik ve şişiklik bar, o, dayanılmaz ağrılar çeke, dep bildirdi. Dilâra Abdullayevanıñ bildirgenine köre, bu alâmetler qannıñ zeerlenmesini köstermek mümkün.
Qırım advokatı Cemil Temişev, Abdullayevge «yeterli tibbiy yardımnıñ kösterilmemesi» aqqında arizanı Rusiye prokuraturasında yolladı. Anda oña, tevqif etilgenniñ «artıq bugün munasip tibbiy yardım körecegini» işandırdılar.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
