Qırım advokatı Cemil Temişev, Aqmescitteki «Hizb ut-Tahrir işi» figurantı Uzeir Abdullayvge «yeterli tibbiy yardımnıñ kösterilmemesi» aqqında ariza ile muracaat etken Rusiyege tabi Qırım prokuraturasında oña, tevqif etilgenniñ «artıq bugün munasip tibbiy yardım körecegini» işandırdılar, dep bildirdi.
Aprel 30-da Qırım.Aqiqat muhbiriniñ bildirgenine köre, bunı Temişev «Qırım birdemligi» birleşmesiniñ ayda bir kere ötkerilgen toplaşuvda çıqışta bulunğanda bildirdi.
Advokat: «Bu gece bir sıra vesiqa azırlamaq mecbur oldım. Sabadan Qırım prokuraturasına kelip, Uzeirge ekimniñ kirmesine izin berilmese neler ola bilecegini tafsilâtlı surette añlatıp yazdım, nevbetçi prokurornen körüştim. O, tedaviylev artıq bugün başlaycağını işandırdı. Eñ başında, bayramlarnıñ bitkenini beklemek kerek, degenlerine rağmen», – dep ikâye etti.
Temişev, künniñ birinci yarısında Abdullayevge tahqiqat izolâtorına Qırımdaki Rusiye Cemiyet közetüv komissiyasınıñ (CKK) azaları keldi, dep ilâve etti. Ziyaretleriniñ neticesi şimdilik belli degil.
Aprel 30, bazarertesi künü Abdullayevniñ anası, tahqiqat izolâtorında bulunğan oğlunda bir qaç künden berli yüksek sıcağı, ayağında şişik ve şişiklik bar, o, dayanılmaz ağrılar çeke, dep bildirdi. Dilâra Abdullayevanıñ bildirgenine köre, bu alâmetler qannıñ zeerlenmesini köstermek mümkünler.
Kremlniñ kontroli altında olğan Qırım Yuqarı mahkemesi Aqmescitteki «Hizb ut-Tahrir işi» figurantları Teymur Abdullayev, Uzeir Abdullayev, Ayder Saledinov, Rustem İsmailov ve Emil Cemadenovnıñ qorçalayıcıları tarafından sıñırlav tedbiriniñ uzatılmasına qarşı berilgen apellâtsiyalarnı red etti.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
