Kremlniñ kontroli altında olğan Qırım Yuqarı mahkemesi aprel 27-de Aqmescitteki «Hizb ut-Tahrir işi» figurantları Teymur Abdullayev, Uzeir Abdullayev, Ayder Saledinov, Rustem İsmailov ve Emil Cemadenovnıñ qorçalayıcıları tarafından sıñırlav tedbiriniñ uzatılmasına qarşı berilgen apellâtsiyalarnı red etti. Bunı Qırım.Aqiqatnıñ muhbiri bildire.
Böylelikle, olar tahqiqat izolâtorında iyün 11-ge qadar qalacaqlar. Mahkeme oturışuvnı qapalı rejimde keçirdi.
Uzeir Abdullayevniñ advokatı Sergey Legostov: «Akemler, muracaatlarda istenilgenine köre oturışuvnı açmaq ya da, iç olmadı, qararnı açıq rejimde ilân etmekni red etti. Bunıñ sebebi olaraq standart olğan telükesizlik aqqında delillerni kösterdiler», – dep añlattı.
Bundan evel faaliyetçiler ve Aqmescitteki «Hizb ut-Tahrir işi» figurantlarınıñ aqrabaları, bu iş boyunca yapılğan qapalı oturışuvğa şikâyet ettiler.
2016 senesi oktâbrniñ 12-sinde Qırımda beş musulman qorantasında tintüvler yapıldı. Tintüvler neticesinde, Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
