Link açıqlığı

Saatnıñ esas haberi

Aqmescit tahqiqat izolâtorında Abdullayevniñ vaziyeti trombnıñ üzülmesi ve sepsis ile yekünlenmek mümkün – advokat


Cemil Temişev
Cemil Temişev

Aqmescit tahqiqat izolâtorında bulunğan Aqmescitteki «Hizb ut-Tahrir işi» figurantı Uzeir Abdullayevniñ vaziyeti «trombnıñ üzülmesi ve umumiyleşken sepsis» ile yekünlenmek mümkün.

Bunı Azatlıq Radiosınıñ rus hizmeti jurnalisti Anton Naumlük, Rusiye prokuraturasına «yeterli derecede tibbiy yardımnıñ kösterilmemesi» aqqında ariza bergen advokat Cemil Temişevge atıfta bulunıp, Facebookta bildirdi.

Naumlük: «Elimdeki malümatqa köre, Abdullayevde el ve ayaqlarındaki qara qan damarlarınıñ tromboflebiti, baldırı ve bileginde tofik zararlanma ve septitsemiyası bar. Vaziyeti trombnıñ üzülmesi ve umumiyleşken sepsis ile yekünlenmek mümkün», – dep, advokatnıñ sözlerini naqil ete.

Onıñ malümatına köre, ekimniñ, Abdullayevni hastahanege yatqızmak kerek, degenine baqmadan, muhakeme etilgenini tekrar izolâtorğa yolladılar. Anda onıñ vaziyeti fenalaştı.

Jurnalist: «Tahqiqat izolâtorında oña yalıñız antibiotik inelerini ura ve zararlanğan yerlerine suvlu melem bezlerini qoyalar», – dep ilâve etti.

Aprel 30, bazarertesi künü Abdullayevniñ anası, tahqiqat izolâtorında bulunğan oğlunda bir qaç künden berli yüksek sıcağı, ayağında şişik ve şişiklik bar, o, dayanılmaz ağrılar çeke, dep bildirdi. Dilâra Abdullayevanıñ bildirgenine köre, bu alâmetler qannıñ zeerlenmesini köstermek mümkünler.

Rusiye advokatı Nikolay Polozov, Qırım cemiyetçileri, Rusiye prezidenti yanındaki İnsan aqları boyunca şura ve Rusiye ombudsmeni Tatyana Moskalkovadan, Abdullayevniñ vaziyeti boyunca munasip areketler yapmaqnı rica etti.

Daa soñra Polozov, cemiyetçilerniñ tahqiqat izolâtorı yanına tevqif etilgenge kelgenlerini yazdı.

Kremlniñ kontroli altında olğan Qırım Yuqarı mahkemesi Aqmescitteki «Hizb ut-Tahrir işi» figurantları Teymur Abdullayev, Uzeir Abdullayev, Ayder Saledinov, Rustem İsmailov ve Emil Cemadenovnıñ qorçalayıcıları tarafından sıñırlav tedbiriniñ uzatılmasına qarşı berilgen apellâtsiyalarnı red etti.

2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.

«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.

XS
SM
MD
LG