Link açıqlığı

Saatnıñ esas haberi

Rusiye tarafından ilhaq etilgen Qırımdaki Rusiye ukümeti qırımtatar milliy areketiniñ veteranı Veciye Kaşkanıñ ölüm şartlarını tahqiq etmey. Bunı aprel 24-te Facebookta Rusiye advokatı Nikolay Polozov yazdı.

Advokat: «Rusiye ukümeti Veciye Kaşkanıñ ölüm şartlarını ale daa tahqiq etmey. Teşkerüvler devam ete, ekspertizalar yapıla, iş ise ale daa açılmadı ve tahqiq etilmey. Teessüf ki, özlerine kerek olğanda olar bütün bürokratik melekelerini çalıştırmağa bile ve vaqıt sozalar», – dep yazdı.

O, «olardan kimse bellemesin ki, Veciye Kaşka unutıldı, ve olar onıñ ölümi içün mesüliyetke çekilmeycekler», – dep qayd etti.

Polozov: «Mustaqil tahqiqat devam ete ve, oña qarşılıq kösterilgenine rağmen, soñuna qadar alıp barılacaq», – dep ilâve etti.

Aprel 24-te qırımtatar milliy areketiniñ veteranı Veciye Kaşkanıñ doğğanına 84 yıl toldı.

Fevralniñ başında Polozov, 2017 senesinde Qırımda Veciye Kaşkanıñ vefatını mustaqil surette tahqiq etmege başladı. Onıñ aytqanına köre, Veciye Kaşkanıñ ölümi – «onı qanunsız olaraq yaqalağan Rusiye telükesizlik hadimleri tarafından quvetniñ adden aşırı ve ğayrı-mutenasip derecede qullanılmasınıñ neticesidir».

Noyabr 23-te Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olarnı Türkiye vatandaşından «aqsız yerde hususan büyük miqdarda para talap etüv»de qabaatladılar. Rusiye telükesizlik hadimleri tarafından yapılğan bu yaqalav esnasında qırımtatar milliy areketiniñ veteranı Veciye Kaşka yaramadı, qadın vefat etti.

Ukrainanıñ qıtadaki qısmında bulunğan QMC prokuraturası, qanunsız tintüvler, yaqalanuvlar ve qırımtatar milliy areketiniñ veteranı Veciye Kaşkanıñ ölümi vaqiası boyunca cinaiy işniñ alıp barılmasını başladı.

Veciye Kaşka – qırımtatar milliy areketiniñ veteranı. O, 1934 senesinde Aluştanıñ civarındaki Üsküt (şimdi Privetnoye) köyünde doğdı. 1944 senesinde qırımtatar halqı sürgün etilgen soñ Veciye Kaşka qorantasınen Özbekistanda yaşadı. 50-nci yıllarda o, aqayı Bekir ile beraber qırımtatar milliy areketine qatıldı.

XS
SM
MD
LG