QMC prokuraturası, ilhaq etilgen Qırımda qırımtatar faaliyetçisi Nariman Memedeminovnıñ taqip etilmesine dair işi boyunca deliller bazasını toplay. Bunı Qırım.Aqiqat Radiosı efirinde muessisedeki cinaiy işniñ alıp barılması boyunca nezaret idaresiniñ rehberi İgor Ponoçovnıy bildirdi.
O, Qırım Muhtar Cumhuriyeti prokuraturası Memedeminovnıñ qanunsız tintilip yaqalanğanı aqqında malümat alğan soñ cinaiy işniñ alıp barılması başlandı, dep bildirdi.
«Şimdi biz eñ tolu şekilde malümat toplaymız, Memedeminovnıñ tahqiqat izolâtorında bulunuvı aqqında öz kanallarından malümat alğan cemiyet teşkilâtlarınen emekdaşlıq yapamız. Bu cinaiy işniñ alıp barılması yaqında başlandı, şimdi deliller bazası toplana», – dedi o.
Muessisedeki cinaiy işniñ alıp barılması boyunca nezaret idaresiniñ rehberi İgor Ponoçovnıy ile intervyüniñ tolu şeklini Qırım.Aqiqat saytında oquñız
Mart 22-de Rusiye telükesizlik ve uquqqoruyıcı organlarnıñ hadimleri Bağçasaray rayonında Memedeminovnıñ evini tinttiler. Bundan soñ faaliyetçini Aqmescitteki Rusiye FSBsi idaresine sorğulamaq içün alıp kettiler. Mart 23-te mahkeme Memedeminovnı mayıs 16-ğa qadar tevqif etti .
Mart 23-te QMC prokuraturası Ukraina Cinaiy kodeksindeki 146-ncı maddeniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddeniñ 2-nci qısmı (mesken toqunılmazlığınıñ bozuluvı) tarafından közde tutulğan cinaiy qanun buzuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina TİNi vatandaş faaliyetçisiniñ yaqalanuvını taqbih ete ve ilhaq etilgen Qırımdaki Rusiye ukümetinden Nariman Memedeminovnıñ azat etilemsini talap ete.
