Dört yıl evel Rusiye, Ukrainada qanunsız, sahte «referendum» ötkerip, onen Ukraina territoriyasınıñ qanunsız ilhaqını örtmek istedi, dep bildirdi AQŞ Devlet departamentiniñ matbuat kâtibi Hezer Nauert.
Nauert: «Qırım sakinleri, ağır silâlı Rusiye ordusınıñ nezareti altında rey bermek mecbur ediler. Rusiyeniñ, Ukraina sakinleri bu sahte «referendum»da serbest saylav yaptılar, degenine er vaqıt kerçekke beñzerlik yetmey edi», – dedi.
Onıñ aytqanına köre, Rusiye dört yıl devamında yarımadanıñ ilhaqını tanımağanlarğa qarşı «zorbalıq ve zorlav» qullana edi.
«Rusiye işğalci ukümeti,em ukümetke bağlı olmağan teşkilâtlar, em de mustaqil kütleviy haber vastalarını muntazam sutette bastırıp, qırımtatarlar, etnik ukrainler, Ukraina tarafını tutqan faaliyetçiler, vatandaşlar toplulığınıñ azaları ve jurnalistlerge qarşı siyasiy maqsatnen yapılğan taqipler ve repressiyalarnı qullandı», – dep qayd etti o, bildirüvde.
Ondan ğayrı, Nauert, mart 14-te yarımdanıñ ziyareti esnasında Rusiye prezidenti Vladimir Putin tarafından seslendirilgen Ukraina territoriyasına iddialarnı yalanladı.
Nauertniñ bildirüvinde: «Prezident Putin, özüniñ Qırımdaki saylav aldı mitinginde Rusiyeniñ Ukraina territoriyasına yalancı iddialarını tekrarlap, Rusiye ukümetiniñ halqara nizamğa emiyet bermegenini ve mustaqil devletlerniñ topraq bütünligini urmet etmegenini daa bir kere açıqtan kösterdi», – denile.
O, AQŞ, dünya tarafından tanılğan sıñırlar içinde Ukrainanıñ suvereniteti ve topraq bütünligine sadıq olğanını tasdiqlay, dep ilâve etti.
AQŞ Devlet departamentiniñ matbuat kâtibi: «Qırım Ukrainanıñ bir qısmıdır ve Rusiye yarımada üzerindeki kontrolini Ukrainağa qaytarmağance bizim Qırımğa qarşı sanktsiyalarımız devam etecek», – dedi.
Rusiye prezidenti Vladimir Putin mart 14-te «iş ziyareti» çerçivesinde ilhaq etilgen Qırımnı ziyaret etti. Kreml matbuat hizmetiniñ malümatına köre, Rusiye prezidenti qurulmaq üzre olğan Keriç köprüniñ qurucılığından ğayrı «Simferopol» ava limanınıñ yañı aerovokzal kompleksini ziyaret etti ve Aqyardaki miting-kontsertte iştirak etti.
Keçken sefer Putin Qırımnı 2017 senesiniñ noyabrinde ziyaret etti. O vaqıt o, Yaltadaki Livadiya sarayınıñ territoriyasında Rusiye çarı III Aleksandr eykeliniñ açılışında iştirak etti.
Ukaina prezidenti Petro Poroşenko, Putinniñ Qırımğa yapqan ziyaretine «havflı provakatsiya» dedi.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ukümetlerini Qırımda Rusiye saylavınıñ qanuniyligini tanımamağa davet etti.
