Ukraina prezidenti Petro Poroşenko, Rusiye prezidenti Vladimir Putinniñ ilhaq etilgen Qırımnı ziyaret etkenine «havflı provakatsiya» dedi. Bunı Poroşenko, mart 14-te Kyivde Avstriya prezidenti Aleksandr Van der Bellen ile birlikte yapqan matbuat konferentsiyasında bildirdi.
Poroşenko: «Bugün Rusiye prezidentiniñ tamam saylavnıñ arfesinde işğal etilgen territoriyağa mahsus kelgeni, Aqmescit, Aqyarnı ziyaret etkeni, pek havflı bir provakatsiyadır. Bu sebepten dünyanıñ, işğal etilgen Qırım territoriyasında Rusiye prezidenti saylavınıñ tanılmamasına dair umumiy yanaşuvı ğayet muimdir», – dedi.
Rusiye prezidenti Vladimir Putin mart 14-te «iş ziyareti» çerçivesinde ilhaq etilgen Qırımğa kelmek istey. Kreml matbuat hizmetiniñ malümatına köre, Putin qurulmaq üzre olğan Keriç köprü ve «Simferopol» ava limanınıñ yañı aerovokzal kompleksini körecek ve Aqyarnı ziyaret etecek.
Keçken sefer Putin Qırımnı 2017 senesiniñ noyabrinde ziyaret etti. O vaqıt o, Yaltadaki Livadiya sarayınıñ territoriyasında Rusiye çarı III Aleksandr eykeliniñ açılışında iştirak etti.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ukümetlerini Qırımda Rusiye saylavınıñ qanuniyligini tanımamağa davet etti.
