Link açıqlığı

Putin, Yaltada Rusiye çarı III Aleksandr eykeliniñ açıluvında iştirak etti – KHV


Rusiye prezidenti Vladimir Putin Yaltada III Aleksandr eykeliniñ açıluvında, 2017 senesi noyabr 18 künü

Rusiye prezidenti Vladimir Putin noyabrniñ 18-nde Yaltadaki Livadiya sarayınıñ territoriyasında Rusiye çarı III Aleksandr eykeliniñ açıluvında iştirak etti. Bunı Rusiye haber agentlikleri bildire.

Kütleviy haber vastalarınıñ (KHV) bildirgenine köre, merasimde Rusiye prezidentiniñ Cenübiy federal okrugındaki siyasiy temsilcisi Vladimir Ustinov, Kremlniñ kontroli altında bulunğan Qırım yolbaşçısı Sergey Aksönov, Aqyarnıñ Rusiyege tabi valisi Dmitriy Ovsânnikov, Aqmescit ve Qırım mitropoliti Lazar ve Qırım musulmanlarınıñ müftisi Emirali Ablayev iştirak ettiler.

«III Aleksandr Rusiyeni seve ve oña inana edi. Ve bugün biz onıñ eykelini açar ekenimiz, onıñ işleri, yapqanları ve yararlıqlarına aqlarını beremiz. Ülkemizniñ üzülmegen tarihına, Vatanına hizmet etken çeşitli unvanlarğa saip ve içtimaiy tabaqalarğa ait insanlarğa sayğımıznı bildiremiz. Eminim ki, şimdiki ve kelecek nesil büyük ecdadımız kibi Vatanınıñ amanlığı ve abadanlığı içün er şey yapar», – deye iqtibas ete Putinniñ sözlerini «Krıminform» neşiri.

Kremlniñ resmiy saytında Rusiye prezidentiniñ Qırımğa kelmesi aqqında haber yoqtır.

Eykel, XIX asırnıñ ekinci yarısında qurulğan ve II Cihan Cenki yıllarında harap etilgen Küçük Livadiya sarayı turğan yerde qoyuldı. III Aleksandr 1894 senesi oktâbrniñ 20-sinde Küçük Livadiya saraınıñ iş odasında öldi.

Bu yılnıñ mart ayında Qırım akimiyeti, imperatorğa eykel qoymaq içün qullanılmaqta olğan tennis ve tansa meydançıqlarını alıp taşladı.

Livadiya sarayı Rusiye imperatorlığınıñ soñki çarı II Nikolay ve onıñ qorantası içün yazlıq rezidentsiya edi. 1945 senesinde bu yerde Stalin, Ruzvelt ve Çerçilniñ iştiraki ile Yalta konferentsiyası deye bilingen Hitlerge qarşı koalitsiyanıñ toplaşuvı ötkerildi.

1974 senesinden başlap muzey kompleksi ziyaretçiler içün açıldı. Livadiya sarayı Ukrainanıñ yedi mucizesinden biri statusını aldı.

XS
SM
MD
LG