Ukraina Yuqarı Radasınıñ deputatları, Qırımda ve Aqyarda Rusiye prezidenti saylavına azırlıq yapılması munasebeti ile parlamentniñ dünya toplulığına muracaatı aqqında qararnı qabul ettiler. Martnıñ 1-nde bu aqta Yuqarı Radanıñ saytında bildirile.
Ukraina Yuqarı Radası, 2018 senesi martnıñ 18-nde Qırımda ve Aqyarda Rusiye prezidenti saylavını ötkermek niyetiniñ «Ukrainanıñ Konstitutsiyası ve qanunları, halqara uquqnıñ temel normaları ve printsipleri ve şu cümleden BMT Nizamnamesi, Avropada emekdaşlıq ve havfsızlıq boyunca keñeşniñ Helsinki Yekünleyici Aktı, 1994 senesi Budapeşt memorandumı, 2014 senesi martnıñ 27-sinde BMT Baş assambleyasınıñ 68-nci sessiyasında qabul etilgen 68/262 nomeralı BMT Baş assambleyasınıñ Ukrainanıñ topraq bütünligi aqqında qararı, diger halqara uquqiy aktlar ve Ukrainanen Rusiye iştirakçileri olğan bir sıra halqara muqavelelerniñ qaba surette bozuluvı olğanını tanıdı.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy. Rusiye prezidentiniñ saylavı ilhaq etilgen Qırımda da keçecek.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Bu qararnıñ leyhası 7546 nomerası altında qayd etildi. Ukraina parlamentiniñ matbuat hizmetinde, Yuqarı Rada bu muracaatnı Çetel işleri boyunca komitetiniñ teklifleri ile beraber qabul etti, dep bildirdiler.
