Rusiye prezidenti Vladimir Putin mart 14-te qurulayatqan Keriç köprüne keldi. Rusiye haber agentlikleriniñ bildirgenine köre, Rusiye devletiniñ başlığı, «qurucılıq işleriniñ ketişatını teşkermek ve qurucılar ile körüşmek» niyetinde.
Qırım kütleviy haber vastalarınıñ malümatına köre, ondan ğayrı köpür qurucılığında Moskva tarafından tayin etilgen Qırım başlığı Sergey Aksönov ve Rusiye naqliyat naziri Maksim Sokolov bulunalar.
Rusiye prezidenti Vladimir Putin mart 14-te «iş ziyareti» çerçivesinde ilhaq etilgen Qırımğa kelmek istey. Kreml matbuat hizmetiniñ malümatına köre, Rusiye prezidenti qurulmaq üzre olğan Keriç köprüniñ qurucılığından ğayrı «Simferopol» ava limanınıñ yañı aerovokzal kompleksini ziyaret etecek ve Aqyardaki miting-kontsertte iştirak etecek.
Keçken sefer Putin Qırımnı 2017 senesiniñ noyabrinde ziyaret etti. O vaqıt o, Yaltadaki Livadiya sarayınıñ territoriyasında Rusiye çarı III Aleksandr eykeliniñ açılışında iştirak etti.
Ukaina prezidenti Petro Poroşenko, Putinniñ Qırımğa yapqan ziyaretine «havflı provakatsiya» dedi.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ukümetlerini Qırımda Rusiye saylavınıñ qanuniyligini tanımamağa davet etti.
Rusiye prezidenti Vladimir Putin Keriç boğazından keçit qurmaq niyeti aqqında Qırımnıñ işğalinden aman soñra, 2014 senesiniñ martında ilân etti. Köpürni 2018 senesine qadar qurmağa ve 2019 senesiniñ yazında işletmege açmağa vade ettiler.
Ukraina tarafı Rusiye ile köpürniñ qurulması aqqında añlaşmadan2014 senesinde – Qırım Rusiye tarafından ilhaq etilgen soñ çıqtı.
Putin ne sebepten Rusiye prezidenti saylavından evel Qırımnı ziyaret etmege qarar bergeni aqqında tafsilâtlıca Qırım.Aqiqat materialında oquñız.
