Rusiye prezidenti vazifesine namzet olğan Kseniya Sobçak saylav aldı munaqaşalar vaqtında, ilhaq etilgen Qırımda teşviqat yapmağa istemegenini ve anda «hümanitar missiya» ile baracaq olğanını bildirdi.
Rusiye haber agentlikleri: «Men anda teşviqat yapmaq istemeyim ve bir vaqıt istemegen edim. Lâkin maña qırımtatarlardan, anda mal-mülküni coyğan adamlardan biñlerce muracaatlar kele. Men Qırımğa hümanitar missiya ile baracaq olam», – dep, Sobçaknıñ «Birinci kanal»da yapılğan munaqaşa esnasındaki sözlerini naqil eteler.
Onıñ aytqanına köre, Rusiyege «sanktsiyalar, ve bütün belâlar, ve bütün dünya ile pek çoq problemalarnıñ sebebi olğan Qırım meselesini daa bayağı vaqıt devamında çezmek kerek olacaq».
Mart 6-da «Vatandaşlar teşebbüsi» fırqasından Rusiye prezidenti vazifesine namzet olğan Kseniya Sobçak Rusiyedeki Ukraina elçiligine, Qırımğa Ukraina territoriyasından kerçerek kirmege izin sorap, mektüp yollağanını bildirdi.
Ukraina İnformatsion siyaset nazirliginde, Sobçak ilhaq etilgen Qırımğa Ukrainanıñ qıtadaki territoriyası tarafından munasip teşkerüvlerden soñ bara bilecegini bildirdiler.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
