«Vatandaşlar teşebbüsi» fırqasından Rusiye prezidenti namzeti Kseniya Sobçak, muhasip organlarnıñ teşkerüvinden soñ qıtadaki Ukraina tarafından Qırımğa bara bilecek. Bunı martnıñ 6-sında Qırım.Aqiqatqa Ukraina informatsion siyaseti naziriniñ birinci muavini Emine Ceppar, Sobçaknıñ Qırımğa Kyivniñ izni ile barmaq istegeni aqqında sözlerini iza etkende söyledi.
Ceppar: «Bir Rusiye vatandaşı ve, munasip şekilde, çetel vatandaşı olaraq o, qıtadaki Ukraina tarafından Qırımğa kirmek aqqına maliktir. Bunıñ içün memuriy sıñırnıñ çetel vatandaşları tarafından keçilmesini tertipke qoyğan qarar bar. Böyle vesiqalar migratsion hizmetke teslim etile, ve onda, munasip izinni bermezden evel böyle vesiqalarnı 5 küngece teşkermege aqqı bar. Misal içün, eger o, qapalı keçüv noqtalarından keçip Qırımnı ziyaret etken olsa, ve munasip hizmetler bundan haberdar olsalar – oña atta qıtadaki Ukrainanıñ territoriyasına kirmekni yacaq etecekler», – dedi.
Ukraina Devlet migratsion hizmetiniñ matbuat kâtibi Sergey Gunko, Qırım.Aqiqat içün bergen izaatta, «bu, konfidentsional malümat ve insannıñ şahsiy bilgileri» olğanı içün Kseniya Sobçaknıñ Qırımnı ziyaret etmek istegini iza etmege aqqı olmağanını söyledi.
Martnıñ 6-sında «Vatandaşlar teşebbüsi» fırqasından Rusiye prezidenti namzeti Kseniya Sobçak Rusiyede Ukrainanıñ elçiligine, Qırımğa Ukraina territoriyasından kirmege izin sorap mektüp yollağanını bildirdi.
2017 senesi oktâbrniñ 18-nde Kseniya Sobçak qomşu Rusiyedeki prezident saylavında iştirak etmek istegenini resmen bildirdi. O, özüne «er keske qarşı» namzet, dey.
Sobçak, ilhaq etilgen Qırımda saylavdan evelki teşviqat kampaniyasını yapmaycağını iddia ete edi. O, Rusiye Qırımnı ilhaq etip, halqara mecburiyetlerini bozdı, dep bildire edi.
Sobçaknıñ fikrine köre, Kyiv ile Moskva birlikte ilhaq etilgen Qırımnıñ statusına dair referendumnı ötkermek kerekler.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
