«Vatandaşlar teşebbüsi» fırqasından Rusiye prezidenti vazifesine namzet Kseniya Sobçak, Ukrainadaki «Mirotvorets» saytınıñ bazasına kirsetilgenine «nevbetteki ahmaqlıq» dedi.
Bunı o, martnıñ 8-nde Rusiye Devlet Dumasınıñ binası yanında bir kişilik piket keçirgen vaqıtta söyledi.
Sobçak, «Mirotvorets» saytınıñ, sanki ilhaqtan soñ Qırımnı «qanunsız olaraq ziyaret etken»inde qabaatlavını iza eterken: «Bu nevbetteki ahmaqlıq, onı iza etmege ne bar? Men er şeyni Ukraina doğru sayğan tertip boyunca yapmağa tırışacam. Men, teşviqat içün degil de, hümanitar maqsatnen ketecegimni bildirdim ve bunı qanun boyunca yapmağa tırıştım. Bunıñ yerine böyle bir hucur cevap aldım», – dedi.
Keçenlerde Ukrainanıñ «Mirotvorets» saytı Kseniya Sobçaknı, «Rusiye tarafından işğal etilgen Qırımğa kirmek maqsadınen Ukraina devlet sıñırını bilerek qanunsız surette keçken»inde qabaatlap, öz bazasına kirsetti.
Sayt, bu qabaatlavnıñ delili olaraq Sobçak ve Rusiye jurnalitsi Anton Krasovskiy tarafından «Сноб.ru» saytı içün yazılğan «İskonno nâş» reportajını ketire.
Rusiye prezidenti vazifesine namzetiniñ ştabında daa evel «2014 senesinde Sobçak Qırımğa mustaqil reportaj yapmaq içün bardı, Ukraina Nazirler Kabinetiniñ yarımadanı ziyaret etüv tertibi aqqında qararı ise bir yıl soñra qabul etildi», – dep bildirdiler.
Ukraina Devlet sıñır hizmetiniñ spikeri Oleg Slobodân «İnterfaks-Ukraina»ğa, Sobçak Ukrainanıñ sıñırnda peyda olsa, Ukraina Devlet sıñır hizmeti, «onıñ tarafından yapılmaq mumkün olğan Ukraina qanunlarınıñ bozuluvını teşkerüv boyunca tedbirler kompleksini keçirecek», dep bildirdi.
Al-azırda Ukraina muessiseleri, Sobçakqa qarşı er angi Ukraina territoriyasına kirüv sıñırlanmalarınıñ olması aqqında bildirmediler.
Martnıñ 6-sında «Vatandaşlar teşebbüsi» fırqasından Rusiye prezidenti vazifesine namzet olğan Kseniya Sobçak Rusiyede Ukrainanıñ elçiligine, Qırımğa Ukraina territoriyasından kirmege izin sorap, mektüp yollağanını bildirdi.
Ukraina İnformatsion siyaset nazirliginde, Sobçak ilhaq etilgen Qırımğa Ukrainanıñ qıtadaki territoriyası tarafından munasip teşkerüvlerden soñ bara bilecegini bildirdiler.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
