Rusiye prezidenti vazifesine namzet olğan Kseniya Sobçaknıñ ştabında onıñ 2014 senesinde Qırımnı ziyaret etkeni içün «Mirotvorets» saytınıñ cedveline kirsetilgenini iza ettiler.
Sobçaknıñ temsilcisi Kseniya Çudinova Rusiyeniñ «RİA Novosti» informatsion agentligi içün bergen izaatta: «2014 senesinde televizion alıp barıcısı Qırımğa 2014 senesi mayısnıñ soñu – iyünniñ başında mustaqil reportaj yapmaq içün bardı, Ukraina Nazirler Kabinetiniñ yarımadanı ziyaret etüv tertibi aqqında qararı ise bir yıl soñra qabul etildi», – dedi.
«Vatandaşlar teşebbüsi» fırqasından Rusiye prezidenti vazifesine namzeti Kseniya Sobçak, sanki ilhaq etilgen yarımadanı 2014 senesinde «qanunsız ziyaret» etkeni içün Ukrainadaki «Mirotvorets» saytınıñ bazasına kirsetildi.
Saytta, Sobçak «Rusiye tarafından işğal etilgen Qırımğa kirmek içün Ukraina devlet sıñırını bilerek qanunsız surette keçti», denile. Saytta bu qabaatlavnıñ delili olaraq Sobçak ve Rusiye jurnalitsi Anton Krasovskiyniñ «Сноб.ru» saytı içün yazılğan «İskonno nâş» reportajı ketirile.
Sobçaknıñ 2014 senesinde ilhaq etilgen Qırımnı ziyaret etkenini Rusiye Devet Dumasınıñ Qırımdan deputatı olğan Natalya Poklonskaya ve Andrey Kosenko bildirdiler.
Martnıñ 6-sında «Vatandaşlar teşebbüsi» fırqasından Rusiye prezidenti vazifesine namzet olğan Kseniya Sobçak Rusiyede Ukrainanıñ elçiligine, Qırımğa Ukraina territoriyasından kirmege izin sorap, mektüp yollağanını bildirdi.
Ukraina İnformatsion siyaset nazirliginde, Sobçak ilhaq etilgen Qırımğa Ukrainanıñ qıtadaki territoriyası tarafından munasip teşkerüvlerden soñ bara bilecegini bildirdiler.
2017 senesi oktâbrniñ 18-nde Kseniya Sobçak qomşu Rusiyedeki prezidenti saylavında iştirak etmek istegenini resmen bildirdi. O, özüne «er keske qarşı» namzet, dey.
Sobçak, ilhaq etilgen Qırımda saylav aldı teşviqat kampaniyasını yapmaycağını iddia ete edi. O, Rusiye Qırımnı ilhaq etip halqara mecburiyetlerini bozdı, dep bildire edi.
Sobçaknıñ fikrine köre, Kyiv ile Moskva birlikte ilhaq etilgen Qırımnıñ statusına dair referendumnı ötkermek kerekler.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
