Link açıqlığı

Saatnıñ esas haberi

Qırımtatar Milliy Meclisiniñ reisi Refat Çubarov, Rusiye prezidenti vazifesine namzet olğan Kseniya Sobçak ilhaq etilgen yaırımadağa ziyaretiniñ maqsatlarını açıqtan bildirmek kerek, dep saya. Bunı Çubarov martnıñ 6-sında Qırım.Aqiqatqa, Sobçaknıñ Qırımğa Kyivniñ izni ile barmaq ve, cümleden, qırımtatarlarnen körüşmek istegenini iza eterken söyledi.

Çubarov: «Onıñ (Sobçaknıñ – QA) körüşüvleri Ukraina territoriyasında (Qırımda – QA) qanunsız olaraq saylavnıñ ötkerilmesi ile alâqalı olsalar, menim fikrimce, böyle körüşüvlerniñ ötkerilmesi problemalı olacaq. O, maqsatlarını açıqtan bildirmek kerek. Qırımtatarlarnen körüşecegi ve qaysı qırımtatarlarnen körüşecegi meselesi bunıñnen alâqalı olacaq», – dedi.

Martnıñ 6-sında «Vatandaşlar teşebbüsi» fırqasından Rusiye prezidenti vazifesine namzet olğan Kseniya Sobçak Rusiyede Ukrainanıñ elçiligine, Qırımğa Ukraina territoriyasından kirmege izin sorap, mektüp yollağanını bildirdi.

Ukraina İnformatsion siyaset nazirliginde, Sobçak ilhaq etilgen Qırımğa Ukrainanıñ qıtadaki territoriyası tarafından munasip teşkerüvlerden soñ bara bilecegini bildirdiler.

2017 senesi oktâbrniñ 18-nde Kseniya Sobçak qomşu Rusiyedeki prezidenti saylavında iştirak etmek istegenini resmen bildirdi. O, özüne «er keske qarşı» namzet, dey.

Sobçak, ilhaq etilgen Qırımda saylav aldı teşviqat kampaniyasını yapmaycağını iddia ete edi. O, Rusiye Qırımnı ilhaq etip halqara mecburiyetlerini bozdı, dep bildire edi.

Sobçaknıñ fikrine köre, Kyiv ile Moskva birlikte ilhaq etilgen Qırımnıñ statusına dair referendumnı ötkermek kerekler.

Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.

Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.

Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG