Link açıqlığı

Saatnıñ esas haberi

Klimkin, Sobçaknıñ Qırımnı ziyaret etmek niyetine «siyasiy şizofreniya» dedi


Ukraina Tış işleri naziri Pavlo Klimkin Rusiye prezidenti vazifesine namzet olğan Kseniya Sobçaknıñ qanuniy tarzda ilhaq etilgen Qırımnı ziyaret etmek niyeti aqqında bildirüvni iza etti.

Klimkin martnıñ 7-sinde Twitterde: «İşğal etilgen Qırımğa kirmek içün Ukraina qanunlarına riayet etmek, bu, elbette, musbet şey. Lâkin işğal etilgen territoriyada qanunsız kampaniyanı alıp barmaq içün qanuniy şekilde kirmek – bu tam bir şizofreniyadır. Tabiiy ki, siyasiy», – dep yazdı.

Ukraina naziri: «Qırımtatarlarnen qonuşmaq içün Kyivge kelip, dünyada tanılğan ve işğal etilgen Qırımda yasaq etilgen Meclisnen körüşmek kerek. Umüt etem ki, Sobçak hanımefendi medeniy dünyanıñ tarafındadır», – dep ilâve etti.

Martnıñ 6-sında «Vatandaşlar teşebbüsi» fırqasından Rusiye prezidenti vazifesine namzet olğan Kseniya Sobçak Rusiyede Ukrainanıñ elçiligine, Qırımğa Ukraina territoriyasından kirmege izin sorap, mektüp yollağanını bildirdi.

Ukraina İnformatsion siyaset nazirliginde, Sobçak ilhaq etilgen Qırımğa Ukrainanıñ qıtadaki territoriyası tarafından munasip teşkerüvlerden soñ bara bilecegini bildirdiler.

2017 senesi oktâbrniñ 18-nde Kseniya Sobçak qomşu Rusiyedeki prezidenti saylavında iştirak etmek istegenini resmen bildirdi. O, özüne «er keske qarşı» namzet, dey.

Sobçak, ilhaq etilgen Qırımda saylav aldı teşviqat kampaniyasını yapmaycağını iddia ete edi. O, Rusiye Qırımnı ilhaq etip halqara mecburiyetlerini bozdı, dep bildire edi.

Sobçaknıñ fikrine köre, Kyiv ile Moskva birlikte ilhaq etilgen Qırımnıñ statusına dair referendumnı ötkermek kerekler.

Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.

Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.

Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG