Yanvarniñ 27-sinde Suvdağda «Qırım birdemligi» cemiyet teşebbüsiniñ körüşüvinde Rusiye telükesizlik hadimleriniñ bulunuvı, Rusiyede Qırım sakinleriniñ birleşmek ve siyasiy mabüslerniñ qorantalarına yardım etmek istegenlerinden qorqqanlarını köstere. Bunı yanvarniñ 29-nda Ukraina Tış işleri nazirliginiñ yolbaşçısı Pavlo Klimkin Twitterdeki saifesinde yazdı.
Klimkin: «Rusiye işğalcileri «Qırım birdemligi» cemiyet birleşmesiniñ körüşüvine basıp kirdi. Aceba, bunı yapmaq içün Qırım sakinleriniñ birleşmek ve siyasiy mabüslerniñ qorantalarına yardım etmek istegenlerinden nasıl qorqmaq kerek. Bütün demokratik dünyanıñ Rusiyeden talabı – işğal etilgen Qırımda insan aqlarınıñ bozuluvı ve siyasiy taqip eüvlerni toqtatmaq», – dep yazdı.
Yanvarniñ 27-sinde Suvdağda «Qırım birdemligi» cemiyet teşebbüsiniñ oturışuvına Rusiye OMONınıñ hadimleri keldi. Telükesizlik hadimleri, olarğa «bu adres boyunca silâlı toplaşuv keçe», dep telefon etkenlerini bildirdiler. Olar, tedbir iştirakçilerinden pasportlar köstermelerini talap etip, aksi alda episini avtozaklarğa yüklep, poliske alıp ketecekleri ile qorquzdılar.
İlhaqtan soñ Qırımnıñ ameldeki Rusiye akimiyeti tarafından mustaqil jurnalistler, cemiyet faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler yapıla.
