Suvdağda yanvarniñ 27-sinde «Qırım birdemligi» oturışuvına kelgen telükesizlik hadimleri, onıñ iştirakçilerinden pasportlarını köstermege talap etip, aksi alda er kesni avtozaklarğa yükleycek ve poliske alıp ketecekleri ile qorquza ediler. Bunı, Facebookta vaqia yerinden translâtsiya etken şaat Ridvan Qırımlı bildirdi.
O: «Telükesizlik hadimleri bizden başta pasportlar köstermekni talap ettiler. Lâkin aq-uquq qorçalayıcıları bunıñ qanunsız olğanını ve bunıñ içün sebep olmaq kerekligini söylediler. Ondan soñ olar, bizge eki şartlarınıñ olğanını ayttılar: ya biz vesiqalarımıznı kösterecekmiz, ya olar bizni yüklep, alıp ketecekler», – dey.
Şaat, pasportları olmağanlarğa ne olacaq, soralğanda, telükesizlik hadimleri yalıñız adları ve soyadlarını yazıp almağa vade ettiler, dep, olarnıñ sözlerini naqil ete.
Aynı zamanda telükesizlik hadimleri öz vesiqalarını köstermek istemediler.
Ridvan Qırımlınıñ aytqanına köre, telükesizlik hadimleri oturışuvnıñ iştirakçilerini namaz qılğan vaqıtlarında bile videoğa çıqara ediler: «Namaz qılğanlarnı kameranen çektiler. Doğrusını aytsam, men ömürimde birinci kere, etrafımda saqçılar turıp, namaz qıldım. Bazılarnı namazğa bile yibermegenlerini eşittim. Bu adamlar neden qorqa?».
Yanvarniñ 27-sinde Suvdağda «Qırım birdemligi» cemiyet teşebbüsiniñ oturışuvına Rusiye OMONınıñ hadimleri keldi.
Telükesizlik hadimleri, olarğa «bu adres boyunca silâlı toplaşuv keçe», dep telefon etkenlerini dediler.
Binanıñ yanına Rusiye OMONınıñ qararnen 15 hadimini ketirgen eki avtozak keldi.
Al-azırda Qırım uquqqoruyıcıları tarafından bu vaziyetke dair izaat berilmedi.
İlhaqtan soñ Qırımda Rusiyeniñ amelde akimiyeti mustaqil jurnalistler, cemiyet faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler yapa.
