Ukraina Tış işleri nazirligi ilhaq etilgen Qırımda Rusiye telükesizlik hadimleri tarafından qırımtatarlar, musulmanlarğa qarşı yapılğan nevbetteki tintüvler ve yaqalanuvlarğa narazılıq bildirdi. Bunı yanvarniñ 25-nde Twitterde Ukraina TİN sözcüsi Maryana Betsa bildirdi.
Ukraina tış işleri muessisesiniñ matbuat hizmeti derc etken bildirüvde: «Rusiye qırımtatarlarnı bastıra. Utanmayıp ve yüzsüzce. Narazılıq bildiremiz. Diskriminatsiyanıñ delillerini Halqara mahkemede taqdim etecekmiz», – denile.
Rusiye telükesizlik hadimleri yanvar 25 sabasında ilhaq etilgen Qırımnıñ Canköy şeerinde ve Seyitler (Nijnöhirskıy) rayonında tintüvler yaptılar. Bundan soñ Canköy faaliyetçisi Enver Kroşnı şeerniñ rayon polis bölügine ve Seyitler Vaqıf (Rozlıvı) köyünde yaqalanğan Ebazer İslâmovnı Seyitler rayon polis bölügine ketirdiler.
Mahkeme, Canköyde tintüvden soñ yaqalanğan Enver Kroşnı 10 künge apis etti. Onı Rusiye kodeksiniñ 20.3 maddesi 1-nci qısmı (ekstrimistik teşkilâtlarnıñ atributları ya da simvolikasını propaganda etüv ya da açıq olaraq numayiş etüv) boyunca memuriy uquq buzuvında qabaatlaylar.
Seyitler (Nijnöhirskıy) rayonınıñ Seyitler Vaqıf (Rozlıvı) köyünde tintüvden soñ yaqalanğan ve polis rayon bölüginden mahkemege ketirilgen Qırım musulmanı Ebazer İslâmovğa rayon mahkemesi binasına «acele yardım» çağırdılar.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübheli tanılğan Qırım musulmanlarınıñ evlerinde ketken sayın daa sıq surette tintüvler yapıla.
