Ukraina Tış işleri nazirliginiñ yolbaşçısı Pavlo Klimkin, Kyivde dekabrniñ 22-sinde bergen matbuat konferentsiyasında, resmiy Kyiv «cenk bitmegence ve topraqlar qaytarılmağance» Qırımda qalğan arbiy tehnikanı keri almaycaq, dedi. Bunı LB.ua bildire.
TİN yolbaşçısı, Rusiyeniñ bu yolnen «Qırımnıñ işğali»ni qanuniyleştirecek olğanını bildirdi, yaza neşir.
Klimkin: «1907 senesi oktâbrniñ 18-nde qabul etilgen 4-nci halqara (Gaaga) konventsiyasınıñ Cenkniñ qanunları ve adetleri aqqında nizamnamesinde, silânıñ yalıñız sulh tizilgen soñ qaytarıla bilecegine açıqtan işaret etile», – dedi.
O, silânıñ qaytarıluvı ceryanı bugün başlansa, bu, «Rusiye tarafından Ukrainağa ait territoriyalarnıñ işğal etilmesi» meselesinde Ukrainanıñ siyasiy ve uquqiy vaziyetini zayıflata bilecek, dep qayd etti, yaza LB.ua.
Neşir TİN yolbaşçısınıñ sözlerini şu şekilde naqil ete: «Biz bunı iç bir vaqıt yapmaycaqmız, böyle adımlar atmaycaqmız».
LB.uanıñ yazğanına köre, Klimkin: «Rusiye, cümleden böyle teklifler sayesinde, Qırımnıñ işğalini qanuniyleştirmege pek istey. Men bunı provakatsiya sayam», – dep qayd etti Ondan ğayrı o, aynı vaqıtta Rusiye tarafından iç bir resmiy teklifniñ yapılmağanını ilâve etti, yaza neşir.
Yanvarnıñ 11-nde Rusiye presidenti Vladimir Putin, Rusiye tarafından ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.
Ukraina Silâlı quvetleriniñ Arbiy deñiz quvetleri komandanı İhor Voronçenko, buña cevaben, Putinniñ tehnikanı qaytarmaq teklifi boyunca Ukraina rehberleri qarar berecek, dedi.
2017 senesiniñ dekabrinde sabıq Ukraina halq deputatı Andrey Sençenko, 2014 senesinde Qırım Rusiye tarafından ilhaq etilgen vaqtında yarımadadan silâlarnı çıqaruv ve arbiy hadimlerniñ qorantaları ile kursantlarnı evakuatsiya etüv aqqında muzakereler etkenini bildirgen edi. Aytqanına köre, o, 3502 aded arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
