Rusiye prezidenti Vladimir Putin, Qırımda Ukrainağa ait «bayağı arbiy yedekler» olğanını tasdiqladı. Rusiye prezidenti yanvarniñ 11-nde Rusiye jurnalistleri ile körüşkende böyle bir beyanat yaptı.
Onıñ aytqanına köre, Rusiye Ukrainağa arbiy yedeklerni qaytarmaq niyetinde degil, lâkin olarnıñ yarımadada mahv etilmesiniñ Ukraina tarafından közetilmesine itirazı yoq.
TASS haberler agentligi Putinniñ sözlerini şöyle ketire: «Bayağı arbiy yedekler bar, lâkin olar, arbiy ekspertlerimizniñ malümatına köre, taşınılmaz vaziyette bulunalar, taşınmaları telükeli; olar bulunğan yerlerinde utilizatsiya etilmek kerekler. Biz Ukraina arbiy hadimlerini, bu arbiy yedeklerniñ utilizatsiya etilmesinde iştirak etmeleri içün davet etmege azırmız».
Ondan ğayrı, cumaaqşamı künü Rusiye prezidenti Rusiyeniñ, ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.
2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini bildirdi. Aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
