Qoşma Ştatlarında Rusiye tarafından ilhaq etilgen Qırımda S-400 ava mudafaası zenit-raketa kompleksiniñ yerleştirilmesine menfiy qıymet keseler. Bunı AQŞ ordusı Avropadaki komandanlığınıñ yüksek seviyeli memurı, özüni tanıtmayıp, söyledi, dep bildire Reuters.
Agentlik: «Bu fenadır, bunıñ soñu hayır olmaz. Biz, elbette, buña ve bunıñ Qara deñizniñ telükesizligi noqtai-nazarından ne manağa kelgenine diqqat etemiz», – dep, AQŞ yüksek seviyeli zabitiniñ sözlerini naqil ete.
Memur, Qırımda S-400 sistemleriniñ yerleştirilmesine «qiymet kesmek qıyın», dep qayd etti. Buña rağmen o, bu soy ava mudafaası vastaları yarımadada Rusiyeniñ arbiy potentsialını quvetlendire, dep tüşüne.
Zabit: «Niyet olsa, bu Qara deñizniñ biraz daa ziyede yerini qorçalamağa, ya da andan ücüm etmege imkân bere… Biz buña, olarda (Rusiyede – QA) arbiy quvet qullanmaq iradesi olğanınıñ daa bir delili olaraq baqamız», – dep bildirdi.
Yanvarniñ 13-nde S-400 «Triumf» ava mudafaası zenit-raketa kompleksleri Aqyardaki Fiolent burnunda «arbiy nevbetke turdılar».
Daa evel Kremlde, S-400 zenit-raketa sistemleriniñ «Rusiye-Ukraina sıñırında provakatsiyaları»nıñ ögüni almaq içün Qırımda yerleştirilgenlerini añlattılar.
Kyivde, Qırımnıñ ilhaqından soñ andaki Rusiyeniñ arbiy mevcüdiyetiniñ arttırılmasına defalarca tecavuziy areket dediler. Ğarp devletleri de, Rusiye tarafından yarımadada arbiy talimlerniñ ötkerilmesi munasebetinen raatsız olğanlarını bildirdiler.
Rusiye, onıñ daa evelki S-300PM kompleksiniñ modifikatsiyası olğan S-400 zenit-raketa kompleksiniñ atış menzili 400 kilometr olğanını ve o, bir kereden 80-ge yaqın nişannı közete bilgenini iddia ete. Rusiye Suriyeniñ ğarbında böyle sistemni daa 2015 senesiniñ soñunda Türkiye uçağı Türkiye-Suriye sıñırında Rusiy uçağını atıp yıqqanda yerleştirdi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
