Rusiye prezidentiniñ matbuat kâtibi Dmitriy Peskov, Putinniñ Qırımdan arbiy tehnikanı alıp bermek teklifi boyunca Kyivniñ «substantiv reaktsiyası» şimdilik olmadı, dep iddia ete.
Rusiyeniñ bir qaç kütleviy haber vastası Peskovnıñ sözlerini: «Biz Kyivden açıq menbalarda yapılğan bir sıra beyanatlar eşittik, lâkir bir de bir substantiv reaktsiya aqqında men bilmeyim», – şeklinde naqil eteler.
Ondan ğayrı Putinniñ sözcüsi, Qırımda qalğan Ukrainanıñ arbiy yedekleri «Kyivniñ temsilcileri ile birlikte» utilizatsiya ete bilecekler, dep ilâve etti.
Yanvarnıñ 11-nde Rusiye presidenti Vladimir Putin, Rusiyeniñ ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.
Buña cevaben Ukraina Silâlı quvetleriniñ Arbiy deñiz quvetleri komandanı İhor Voronçenko, Putinniñ tehnikanı qaytarmaq teklifi boyunca Ukraina rehberleri qarar berecek, dedi.
2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini bildirgen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
