Yanvarniñ 13-nde S-400 «Triumf» avanı mudafaa zenit raketa kompleksleri Aqyardaki Fiolent burnunda arbiy nevbetke turalar. Bunı, Rusiye Qara deñiz flotu matbuat hizmetinden naqil etip, Rusiye KHV bildireler.
TASS: «Aqyardaki Fiolent burnunda arbiy nevbetke turğan künü (Rusiye Mudafaa nazirliginiñ – QA) Cenübiy arbiy okrugı Arbiy ava quvetleri (AAQ) ve Avanı mudafaa quvetleri (AMQ) komandanı general-leytenant Viktor Sevastyanovnıñ rehberligi altında sistemlerniñ «Pantsir S-1» uçaqlarğa qarşı raketa-top kompleksleriniñ mudafaası altında mevzilerine ketirilmesi, askeriy taqımlarnıñ tehnikanı arbiy vaziyetke ketirilmesi boyunca areketleri, nişannı tayin etüv vastalarınıñ çalışması kibi tantanalı tedbirler ötkerilecek. Tedbirlerniñ eñ soñunda arbiy bayraq çıqarılacaq. Tedbirde veteranlar, ruhaniyler, yunarmiya (bala ordusı – QA) teşkilâtınıñ azaları iştirak etecekler», – dep bildire.
Rusiye arbiy quvet strukturalarınıñ saytlarında bu malümat şimdilik tasdiqlanmadı.
Daa evel Kremlde, Qırımda S-400 zenit raketa sistemleri «Rusiye-Ukraina sıñırında provakatsiyalar»nıñ ögüni almaq içün yerleştirildi, dep añlattılar.
Yarımadada birinci S-400 sistemaları daa 2017 senesiniñ yanvarinde arbiy nevbetke turdılar. 2017 senesiniñ dekabrinde, ilhaq etilgen Qırımda 2018 senesiniñ ilk künlerinde eki S-400 zenit raketa sistemi divizionınıñ arbiy nevbetke turacağı belli oldı.
Ukraina Yuqarı Radasınıñ Çetel işleri boyunca komitetiniñ reisi Hanna Hopko, AQŞ ve Avropa Birligi Qırımda S-400-lerniñ yerleştirilmesine qarşılıq köstermek kerekler, dep saya.
Rusiye, onıñ daa evelki S-300PM kompleksiniñ modifikatsiyası olğan S-400 zenit raketa kompleksiniñ atış menzili 400 kilometr olğanını ve o, bir kereden 80-ge yaqın nişannı közete bilgenini iddia ete. Rusiye böyle bir sistemini Suriyeniñ ğarbında daa 2015 senesiniñ soñunda Türkiye uçağı Türkiye-Suriye sıñırında Rusiy uçağını atıp yıqqanda yerleştirdi.
